محکمہ داخلہ میں "پنجاب وار بُک" کی تیاری بارے اجلاس میں اہم فیصلے

08-19-2025

(لاہور نیوز) سیکرٹری داخلہ پنجاب ڈاکٹر احمد جاوید قاضی نے اجلاس کی صدارت کی، جنگ اور ہنگامی حالات سے نمٹنے کیلئے مربوط حکمت عملی کا ابتدائی خاکہ پیش کیا گیا۔

محکمہ داخلہ ڈیفنس پلاننگ ونگ نے دشمن کے ممکنہ حملے کی صورت میں 33 متعلقہ محکمہ جات کے کردار بارے بریفنگ دی، 1981 میں تیار کردہ پنجاب وار بُک کو 45 سال بعد جدید تقاضوں سے ہم آہنگ کیا جا رہا ہے۔       وار بُک میں ہر محکمے اور ادارے کی ذمہ داریوں کی واضح حد بندی کی جا رہی ہے، صوبہ بھر کی اہم تنصیبات اور عوام کے جان ومال کے تحفظ کیلئے ضروری اقدامات بارے بھی بریفنگ دی گئی، حکومت پاکستان کی وار بُک کے تناظر میں پنجاب وار بُک کے خدوخال پر مشاورت  کی گئی جنگ کی صورت میں میزائل حملے، ڈرون حملے یا سائبر اٹیک سے محفوظ رہنے اور فوری رسپانس کی حکمت عملی پر مشاورت کی گئی۔ تمام رہائشی علاقوں میں محفوظ بنکرز اور شیلٹرز کی تعمیر کیلئے قوانین زیر غور آئے، پنجاب میں عوام کے جان و مال کے تحفظ کیلئے باریک بینی سے پر پہلو پر غور کیا گیا، سیکرٹری داخلہ نے کہا کہ جنگ کی صورت میں اہم تنصیبات کو محفوظ بنانے کیلئے پروٹوکولز جدید تقاضوں سے ہم آہنگ کر رہے ہیں۔ بریفنگ میں کہا گیا کہ ڈویژنل، ضلعی انٹیلی جنس کمیٹیوں کو ہنگامی صورتحال سے نمٹنے کیلئے اختیارات دئیےجائیں گے، ہنگامی صورتحال میں خوراک اور ادویات کی بروقت ترسیل یقینی بنانا نہایت اہم ہے، تمام اضلاع میں موجودہ وسائل کی میپنگ جلد مکمل کی جائے گی۔ شہری دفاع کیلئے سول ڈیفنس کو ہر ممکن وسائل فراہم کیے جا رہے ہیں،ہنگامی صورتحال میں ہسپتالوں ،مواصلاتی نظام کو مکمل فعال رکھا جائے گا، سوشل میڈیا پر ممکنہ پراپیگنڈا کی روک تھام اور مستند اطلاعات کی ترسیل بارے بھی تبادلہ خیال کیا گیا۔ سیکرٹری داخلہ پنجاب کی سول ڈیفنس کو صوبہ بھر میں محفوظ شیلٹرز کے تعین کی ہدایت کی ،محکمہ داخلہ کے مرکزی کنٹرول روم کے ماتحت تمام اضلاع میں کنٹرول رومز فعال کرنےکا حکم دیا جبکہ جنگ، ہنگامی حالات سے نمٹنے کیلئے مربوط حکمت عملی کا ابتدائی خاکہ  بھی پیش کیا گیا۔ اجلاس میں ایڈیشنل آئی جی پنجاب طارق چوہان، ڈاکٹر رضوان نصیر ،سپیشل سیکرٹری داخلہ فضل الرحمان ،ڈی آئی جی سپیشل برانچ خرم شہزاد، ایڈیشنل ڈی جی پی ڈی ایم اے جواد حیدر، ایڈیشنل سیکرٹری ڈیفنس پلاننگ، ایڈیشنل سیکرٹری داخلہ عاصمہ چیمہ، ایڈیشنل سیکرٹری عظمیٰ سلیم،کنسلٹنٹ میجر (ر) مدثر بٹ اور ڈائریکٹر سول ڈیفنس ضیغم نواز بھی شریک ہوئے۔