سیف سٹی ورچوئل بلڈ بینک کی کامیابی، گردے کے کینسر میں مبتلا بچے کی جان بچ گئی

08-19-2025

(لاہور نیوز) سیف سٹی میں قائم ورچوئل بلڈ بینک نے ایک اور کامیابی حاصل کی ہے، جس کے تحت گردے کے کینسر میں مبتلا بچے کو بروقت خون کی فراہمی سے معصوم کی جان بچا لی گئی۔

چلڈرن ہسپتال سے ایک شہری  نے ایمرجنسی 15 پر کال کی اور فوری خون کی درخواست کی، کال کرنے والے  نے بتایا کہ اس کا بچہ آئی سی یو میں زیر علاج ہے اور خون کی فوری ضرورت ہے۔ سیف سٹی آفیسر  نے فوری طور پر کارروائی کرتے ہوئے سیف سٹی بلڈ بینک کے ڈیٹا بیس سے مطلوبہ خون کے ڈونر کی تلاش کی اور ڈولفن فورس آفیسر راحیل نے بروقت خون عطیہ کیا۔ اس بروقت اقدام کے نتیجے میں گردے کے کینسر میں مبتلا ننھے صمصام کی جان بچا لی گئی، بچے کے والد نے سیف سٹی کے بروقت اقدام پر شکریہ ادا کرتے ہوئے دعائیں دیں۔ ترجمان سیف سٹی کا کہنا ہے کہ سیف سٹی کا ورچوئل بلڈ بینک میڈیکل ایمرجنسی کی صورت میں بغیر چھٹی کئے 24 گھنٹے مدد فراہم کرتا ہے تاکہ ضرورت مندوں کی فوری مدد کی جا سکے۔