ڈپٹی کمشنر لاہور کی قیادت میں انسدادِ ڈینگی مہم، سپرے کا عمل جاری

08-19-2025

(لاہور نیوز) ضلعی انتظامیہ لاہور نے ڈینگی کے خاتمے کیلئے اپنی کوششیں تیز کر دی ہیں اور انسداد ڈینگی مہم کے تحت سرویلنس اور تدارک کا عمل جاری رکھا ہوا ہے۔

ڈپٹی کمشنر لاہور سید موسیٰ رضا کی قیادت میں یہ مہم بھرپور انداز میں جاری ہے، ڈپٹی کمشنر  نے حال ہی میں تحصیل نشتر کا دورہ کیا جہاں انہوں  نے ڈینگی سرویلنس کا جائزہ لیا، ان کے ہمراہ چیف آفیسر ایم سی ایل، اے ڈی سی جی اور سی ای او ہیلتھ بھی موجود تھے، جنہوں  نے انہیں انسدادِ ڈینگی اقدامات پر تفصیلی بریفنگ دی۔ اس دوران ڈپٹی کمشنر لاہور  نے اٹاری دربار روڈ، یوسی 242 اور ان کے اطراف کے علاقوں کا تفصیلی دورہ کیا جہاں لاروا ملنے پر فوری طور پر تلفی کی کارروائی شروع کر دی گئی، انہوں  نے سخت ہدایات جاری کیں کہ تمام الائیڈ محکمے انسداد ڈینگی کیلئے ایک مربوط حکمت عملی اپنائیں اور ڈینگی ورکرز کی حاضری اور کارکردگی پر کوئی سمجھوتہ نہ کیا جائے۔ انہوں  نے شہریوں کو ڈینگی سے بچاؤ کے احتیاطی تدابیر سے آگاہ کرنے کی ضرورت پر زور دیتے ہوئے کہا کہ عوام کے تعاون سے ہی ہم ڈینگی کے خلاف جنگ جیت سکتے ہیں۔