پنجاب بھر میں ڈرائیونگ لائسنس کا اجرا، لاکھوں شہری مستفید

08-19-2025

(لاہور نیوز) پنجاب بھر میں شہریوں کو ڈرائیونگ لائسنس کی سہولت کی فراہمی کا عمل تیزی سے جاری ہے۔

ترجمان ٹریفک پولیس کے مطابق رواں ماہ کے دوران اب تک 4 لاکھ 66 ہزار سے زائد افراد نے مختلف ڈرائیونگ لائسنس خدمات سے فائدہ اٹھایا ہے، 1 لاکھ 58 ہزار سے زائد شہریوں  نے لرننگ لائسنس حاصل کئے، جبکہ اتنی ہی تعداد میں ریگولر ڈرائیونگ لائسنس بھی جاری کئے گئے۔ اس کے علاوہ 1 لاکھ 3 ہزار سے زائد افراد  نے اپنے لائسنس کی تجدید کرائی اور 4 ہزار سے زائد شہریوں کو انٹرنیشنل ڈرائیونگ پرمٹ بھی جاری کئے گئے۔ ترجمان  نے یہ بھی بتایا کہ موٹرسائیکل سواروں کو بھی ایک ہی دن میں لرننگ اور ریگولر ڈرائیونگ لائسنس فراہم کئے جا رہے ہیں تاکہ ان کی سفری سہولت میں اضافہ ہو سکے۔ ڈی آئی جی ٹریفک نے اس بات پر زور دیتے ہوئے کہا کہ بغیر ڈرائیونگ لائسنس کے گاڑی یا موٹر سائیکل چلانا قانونی جرم ہے، انہوں  نے مزید کہا کہ اس خلاف ورزی کے خلاف 90 روزہ کریک ڈاؤن جاری ہے تاکہ ٹریفک قوانین کی پابندی کو یقینی بنایا جا سکے۔