دوسروں کی راحت، آسودگی اور آسانیوں کا وسیلہ بننا انسانیت کی خدمت ہے: مریم نواز

08-19-2025

(لاہور نیوز) وزیراعلیٰ پنجاب مریم نواز شریف نے کہا ہے کہ انسانیت عظیم نسبت ہے جو تمام رشتوں سے بلند اور ہر سرحد سے بے نیاز ہے۔

وزیراعلیٰ پنجاب مریم نواز شریف نے انسانی ہمدردی کے عالمی دن پر اپنے پیغام میں کہا ہے کہ دوسروں کے لیے راحت، آسودگی اور آسانیوں کا وسیلہ بننا انسانیت کی خدمت ہے،دنیا بھر کے انسانیت کے خدمت گاروں کو سلام پیش کرتی ہوں۔ مریم نواز نے کہا کہ انسانیت کی خدمت کا جذبہ رنگ،مذہب اور ہر تعصب سے بالاتر ہے، موجودہ عالمی حالات کے تناظرمیں انسانیت کی خدمت کا جذبہ پہلے سے کہیں زیادہ ضروری ہے۔ انہوں نے کہا کہ غزہ کا معصوم شہید انسانیت کے ضمیر کو جھنجھوڑ رہا ہے، غزہ کے بچوں اور کشمیریوں کی آہیں دنیا کے ہر حساس دل کو پکار رہی ہیں، انسان سے ہمدردی عبادت کے مترادف ہے، یہی سب سے بڑی خدمت ہے۔ وزیراعلیٰ نے کہا کہ حکومت پنجاب کا ہر اقدام اور پراجیکٹ انسانی ہمدردی اور عوام کی خدمت کے لئے ہے، ایسی دنیا بنائیں جہاں امن،محبت اور انسانیت ہو۔