مریم نواز کا ماحولیاتی آلودگی کے خاتمے، جدید شہری ترقی کیلئے جاپان سے سیکھنے کا فیصلہ

08-18-2025

(لاہور نیوز) وزیراعلیٰ پنجاب مریم نواز شریف نے جاپان کے جدید شہری ترقیاتی ماڈلز اور ماحولیاتی آلودگی کے خاتمے کے لئے جاپان کے تجربات سے سیکھنے کا فیصلہ کیا ہے۔

وزیراعلیٰ نے اپنے وفد کے ہمراہ جاپان کے تجارتی، معاشی اور ثقافتی مرکز یوکوہاما شہر کا دورہ کیا، یوکوہاما کے ٹاؤن ہال میں وزیراعلیٰ اور وفد کو اربن ڈویلپمنٹ کے ماڈلز پر بریفنگ دی گئی، اس موقع پر پنجاب اور یوکوہاما کے درمیان "سٹی ٹو سٹی" تعاون پر اتفاق کیا گیا جس میں ماحولیات کے تحفظ، شہروں کی جدید ترقیاتی منصوبہ بندی اور شہری سہولیات کی بہتری شامل ہے۔ وزیراعلیٰ مریم نواز  نے کہا ہے کہ پنجاب میں سڑکوں اور عمارتوں کا تعمیراتی معیار جاپان کے برابر لانے کے لئے عملی اقدامات کئے جائیں گے، دورے کے دوران راوی اربن ڈویلپمنٹ اتھارٹی (روڈا) اور یوکوہاما کے درمیان مختلف شعبوں میں تعاون کے امکانات پر بھی غور کیا گیا۔ مزید برآں لاہور اور اسلام آباد کے درمیان تیز رفتار ٹرین چلانے اور ریلوے اپ گریڈیشن میں جاپان کے تعاون کا جائزہ لیا گیا، وزیراعلیٰ نے جدید ترین جاپانی چیئر لفٹ اور ایئر کیبن منصوبوں کا بھی معائنہ کیا۔