تنخواہ دار طبقے پر ٹیکس کا بوجھ مزید کم کرنے کی کوشش کریں گے: وفاقی وزیر خزانہ

08-18-2025

(لاہور نیوز) وفاقی وزیر خزانہ محمد اورنگزیب نے کہا ہے کہ حکومت کا کام کاروبار کرنا نہیں بلکہ اس کیلئے سازگار ماحول فراہم کرنا ہے، پوری کوشش ہو گی کہ تنخواہ دار طبقے پر ٹیکس کا بوجھ مزید کم کریں۔

انہوں نے کہا کہ معاشی استحکام کے لئے پرائیویٹ سیکٹر کو اپنا بھرپور کردار ادا کرنا ہو گا، میں خود پرائیویٹ سیکٹر سے آیا ہوں، پرائیویٹ سیکٹر دن میں 8 سے 12گھنٹے کام کرتا ہے، کارپوریٹ سیکٹر نہیں ہے، یہ کمی نظر آئی۔ انہوں نے نوجوانوں کو نصیحت کی کہ عملی زندگی میں کوئی شارٹ کٹ نہیں ہوتا، نوجوان محنت کو اپنا شعار بنائیں، اتارچڑھاؤ آتے ہیں لیکن ٹیلنٹ کو کوئی فرق نہیں پڑتا، ہمیں مستقل گروتھ کی طرف جانا ہے۔ وفاقی وزیر خزانہ نے کہا کہ ٹیرف اصلاحات لائی گئی ہیں، سٹاک ایکسچینج روزانہ نئے ریکارڈ بنا رہی ہے، سٹاک مارکیٹ میں تیزی معاشی بہتری کی علامت ہے، توانائی کی قیمتوں میں کمی کے حوالے سے درست سمت میں گامزن ہیں۔