مریم نواز شریف آج جاپان کے شہر یوکو ہاما میں مصروف دن گزاریں گی

08-18-2025

(لاہور نیوز) وزیراعلیٰ پنجاب مریم نواز شریف کے دورہ جاپان کی سرکاری مصروفیات کا آغاز آج (18 اگست) سے ہو گا۔

یاد رہے کہ وزیراعلیٰ پنجاب مریم نواز شریف جاپانی حکومت کی دعوت پر 5 روزہ سرکاری دورہ کر رہی ہیں۔ وزیراعلیٰ پنجاب مریم نواز شریف آج جاپان کے معروف شہر یوکو ہاما میں مصروف دن گزاریں گی، مصروفیات کا آغاز یوکو ہاما کے میئر ڈاکٹر ٹاکیہارو یاماناکا سے رسمی ملاقات سے ہو گا، یوکو ہاما کے میئر ڈاکٹر ٹاکیہارویاماناکا وزیراعلیٰ پنجاب اور وفد کے اعزاز میں ظہرانہ بھی دیں گے۔ مریم نواز شریف یوکو ہاما ریڈ بریک ویئر ہاؤس، جدید ترین کیبل کار یوکو ہاما ایئر کیبن اور یوکو ہاما کی واٹر اینڈ سیوریج فیسلیٹی کا دورہ بھی کریں گی۔ وزیراعلیٰ پنجاب جاپان میں مقیم پاکستانی کمیونٹی سے ملاقات بھی کریں گی، بعدازاں مریم نواز شریف اور وفد کے اعزاز میں جاپان میں مقیم پاکستانیوں کی طرف سے عشائیہ بھی دیا جائے گا۔ واضح رہے کہ گزشتہ رات وزیراعلیٰ پنجاب مریم نواز شریف تھائی لینڈ سے جاپان پہنچیں، ہینڈا ایئرپورٹ ٹوکیو پہنچنے پر مریم نواز شریف کا پُرتپاک خیر مقدم کیا گیا، جاپان گورنمنٹ کے اعلیٰ افسران اور سفارتی حکام  نے وزیراعلیٰ پنجاب کا خیر مقدم کیا، جاپان میں متعین پاکستان کے سفیر عبد الحمید  نے پنجاب کے وفد کو خوش آمدید کہا۔ جاپان میں مقیم اوورسیز پاکستانیوں کی کثیر تعداد بھی وزیراعلیٰ پنجاب مریم نواز شریف کے استقبال کے لئے موجود تھی۔