عوام ایکسپریس کو حادثہ، ایک مسافر جاں بحق، 20 سے زائد زخمی

08-17-2025

(لاہور نیوز) پشاور سے براستہ لاہور کراچی جانے والی عوام ایکسپریس بڑے حادثے کا شکار ہوگئی، لودھراں ریلوے سٹیشن کے قریب ٹرین کی 5 بوگیاں پٹری سے اتر کر الٹ گئیں۔

ریسکیو حکام کے مطابق حادثے میں ایک مسافر جاں بحق ہوگیا جبکہ 20 سے زائد مسافر زخمی ہوئے ہیں، جاں بحق ہونے والے مسافر کی شناخت وقاص کے نام سے ہوئی ہے جو خوشاب کا رہائشی تھا۔ حادثے کے بعد بوگیوں میں پھنسے افراد کو نکالنے کیلئے ریسکیو ٹیموں نے فوری کارروائی کی، جبکہ زخمیوں کو فوری طور پر لودھراں ڈسٹرکٹ ہسپتال منتقل کیا گیا ہے، جہاں متعدد زخمیوں کی حالت تشویشناک بتائی جا رہی ہے۔ ریسکیو 1122، پولیس اور ضلعی انتظامیہ نے ریلیف اینڈ ریسکیو آپریشن مکمل کر لیا ہے۔ ڈپٹی کمشنر ڈاکٹر لبنیٰ نذیر کی ہدایت پر اسسٹنٹ کمشنر ارم شہزادی نے ڈی ایچ کیو ہسپتال میں ٹرین حادثے کے زخمی مسافروں کی عیادت کی اور انہیں ناشتہ بھی فراہم کیا، لودھراں ٹرین کے مسافروں کے آرام کیلئے کے میونسپل سٹیڈیم میں انتظامات مکمل کر دیئے گئے، لودھراں ڈپٹی کمشنر نے جائے حادثہ پر ریسکیو آپریشن کی نگرانی کی۔ حادثے کے باعث اپ اور ڈاؤن ریلوے ٹریک بند ہوگئے، متعدد ٹرینیں تاخیر کا شکار ہوگئیں جبکہ حادثے کے مقام پر ٹریک کی بحالی کا کام بھی جاری ہے۔ وزیر ریلوے حنیف عباسی کا نوٹس، ہنگامی اجلاس طلب دوسری جانب وزیر ریلوے محمد حنیف عباسی نے دورہ کراچی منسوخ کر دیا اور ریلوے ہیڈ کوارٹرز لاہور میں ہنگامی اجلاس طلب کر لیا۔ وزیر ریلوے کل لودھراں میں جائے حادثہ کا دورہ بھی کریں گے۔ وزیر ریلوے کا کہنا ہے کہ کسی طور پر بھی کسی کو انسانی جانوں سے کھیلنے کی اجازت نہیں دے سکتے، حادثہ کے ذمہ داروں کے خلاف صرف تادیبی کارروائی یا ٹرانسفر نہیں کریں گے، سخت ترین ایکشن لیں گے، ریلوے میں اصلاحات شروع کر دی ہیں، ثمرات جلد عوام تک پہنچیں گے۔