چینی کی بلاتعطل سپلائی یقینی بنانے کیلئے 7 رکنی کوآرڈینیشن کمیٹی تشکیل

08-16-2025

(لاہور نیوز) صوبہ پنجاب میں چینی کی بلاتعطل فراہمی اور شوگر انڈسٹری کو درپیش مسائل کے بروقت حل کیلئے شوگر ملز ایسوسی ایشن اور محکمانہ افسران پر مشتمل سات رکنی کوآرڈینیشن کمیٹی قائم کر دی گئی۔

کمیٹی کا کنوینر ڈی جی فوڈ اور کین کمشنر پنجاب نوید شہزاد مرزا کو مقرر کیا گیا ہے، اس حوالے سے نوٹیفکیشن سیکرٹری پرائس کنٹرول اینڈ کموڈیٹیز مینجمنٹ ڈیپارٹمنٹ ڈاکٹر احسان بھٹہ کی ہدایت پر جاری کیا گیا۔ کمیٹی کا مقصد چینی کی مسلسل سپلائی کو یقینی بنانا اور صنعت سے متعلقہ امور کو باہمی مشاورت سے جلد از جلد حل کرنا ہے تاکہ صارفین کو کسی قسم کی قلت یا قیمتوں میں غیر ضروری اتار چڑھاؤ کا سامنا نہ ہو۔