سی سی ڈی اغوا برائے تاوان سیل کی کارروائی، لاپتہ 10 بچے بازیاب

08-16-2025

(لاہور نیوز) سی سی ڈی اغوا برائے تاوان سیل نے مختلف علاقوں میں سرچ آپریشن کرتے ہوئے گمشدہ اور گھروں سے بھاگے ہوئے 10 بچوں کو بازیاب کرا لیا۔

ترجمان سی سی ڈی کے مطابق بازیاب ہونے والے بچوں کا تعلق لاہور، قصور، راولپنڈی، اوکاڑہ، مظفرگڑھ، خانیوال، بہاولپور سمیت دیگر شہروں سے ہے، یہ بچے درباروں، ریلوے سٹیشنز اور بس سٹینڈز جیسے مقامات سے بازیاب کرائے گئے جہاں یہ بھٹک گئے تھے یا پھر غیرمحفوظ حالت میں موجود تھے۔ بازیابی کے بعد تمام بچوں کو ضابطے کی کارروائی مکمل کرنے کے بعد بحفاظت ان کے والدین کے سپرد کر دیا گیا۔ ترجمان  نے مزید بتایا کہ سیل  نے جدید ٹیکنالوجی، مخبر نظام اور مقامی پولیس کے تعاون سے یہ کارروائیاں کیں، بچوں کی بازیابی پر والدین  نے سی سی ڈی ٹیم کا شکریہ ادا کرتے ہوئے ان کی کوششوں کو سراہا۔ سی سی ڈی کا کہنا ہے کہ بچوں کے تحفظ اور گمشدگی کے واقعات کی روک تھام کے لئے سرچ آپریشنز کا سلسلہ جاری رہے گا، جبکہ والدین سے اپیل کی گئی ہے کہ بچوں کی حفاظت پر خصوصی توجہ دیں اور مشکوک سرگرمیوں کی فوری اطلاع پولیس کو دیں۔