ایک ہفتہ میں چینی 18 روپے فی کلو مہنگی ہوئی: ادارہ شماریات کی رپورٹ

08-15-2025

(لاہور نیوز) ملک میں چینی کی اوسط قیمت سرکاری ریٹ پر نہ آ سکی، ایک ہفتے کے دوران چینی کی قیمت میں 18 روپے فی کلو کا بڑا اضافہ ہوا ہے۔

ملک میں چینی کی زیادہ سے زیادہ قیمت 190 روپے فی کلو تک برقرار ہے، وفاقی ادارہ شماریات نے چینی کی قیمتوں کے نئے اعدادو شمار جاری کر دیئے ہیں جس کے مطابق اسلام آباد میں ایک ہفتے میں چینی کی قیمت 18 اور راولپنڈی میں 12 روپے فی کلو تک بڑھ گئی،  ایک ہفتے میں چینی کی اوسط قیمت میں 52 پیسےفی کلو کا اضافہ ہوا۔ ملک میں چینی کی اوسط قیمت بڑھ کر 179 روپے 19 پیسے فی کلو ہو گئی، گذشتہ ہفتےتک چینی کی اوسط قیمت 178 روپے 67 پیسے فی کلو تھی، ایک سال قبل ملک میں چینی کی اوسط قیمت 145روپے 88 پیسے فی کلو تھی۔ اسی طرح پنجاب میں چینی کی زیادہ سے زیادہ قیمت 190 روپے فی کلو تک ہے، کراچی، پشاور، اسلام آباد اور بہاولپور میں چینی کی زیادہ سے زیادہ قیمت 190 روپے کلو تک ہے، واضح رہے کہ وفاقی حکومت نے 15 جولائی سے چینی کی ایکس مل قیمت 165 روپے فی کلو مقررکرنےکا اعلان کیا تھا جبکہ اسلام آباد میں 172، پنجاب اور کراچی میں چینی کی ریٹیل قیمت 173 روپےفی کلو مقرر کی گئی۔