پنجاب حکومت کا مری میں پارکس اینڈ ہارٹیکلچر ایجنسی قائم کرنے کا فیصلہ

08-12-2025

(لاہور نیوز) پنجاب حکومت نے سیاحتی شہر مری میں قدرتی خوبصورتی کے تحفظ اور تزئین و آرائش کیلئے "مری پارکس اینڈ ہارٹیکلچر ایجنسی" قائم کرنے کا فیصلہ کر لیا ہے۔

سیکرٹری ہاؤسنگ نورالامین مینگل نے ڈی جی پی ایچ اے پنجاب کو اہم ٹاسک سونپ دیا، پی ایچ اے کے قیام کی منظوری کیلئے سمری وزیر اعلیٰ پنجاب مریم نواز کو پیش کی جائے گی۔ ترجمان محکمہ ہاؤسنگ کے مطابق پی ایچ اے کے قیام سے مقامی سطح پر گرین ایریاز کو بڑھایا جائے گا، مقامی جنگلات کے فروغ کیلئے بڑے پیمانے پر شجرکاری مہم چلائی جائے گی۔ شہریوں، سیاحوں کیلئے نمائش سمیت تقریبات کا انعقاد کیا جائے گا، اشتہارات، سائن بورڈز اور گرین ایریاز کے ذریعے ریونیو جنریشن ماڈل تشکیل دیا جائے گا۔ مری پی ایچ اے کیلئے افسران اور عملہ کی تعیناتی کی جائے گی، منصوبے سے مری کی مقامی آبادی اور سیاح مستفید ہو سکیں گے۔ وزیر اعلیٰ کے ویژن کے مطابق سیاحتی مقامات کی خوبصورتی کو بڑھایا جائے گا، پی ایچ اے ایجنسیوں کا جال بہت جلد صوبہ بھر میں پھیلانے جا رہے ہیں۔