شادمان تھانہ جلاؤ گھیراؤ کیس، شاہ محمود قریشی بری، یاسمین راشد سمیت دیگر کو سزائیں

08-11-2025

(لاہور نیوز) پاکستان تحریک انصاف کے سینئر رہنما شاہ محمود قریشی کو شادمان تھانہ جلاؤ گھیراؤ اور پولیس کی گاڑیاں جلانے کے مقدمات سے بری کر دیا گیا۔

انسداد دہشت گردی عدالت لاہور کے جج منظر علی گل نے سانحہ 9 مئی لاہور کے 2 مقدمات کا فیصلہ سنایا ہے، عدالت نے شاہ محمود قریشی کو دونوں مقدمات میں بری کر دیا جبکہ مقدمہ میں شریک یاسمین راشد، اعجاز چوہدری، محمود الرشید اور سرفراز چیمہ کو 10،10 سال قید کی سزا کا حکم سنا دیا ہے۔ عدالت کی جانب سے درج مقدمات نمبر 103/23 اور 768/23 کا فیصلہ سنایا گیا ہے، ان میں پہلا تھانہ شادمان نذر آتش اور دوسرے راحت بیکری چوک میں پولیس گاڑی جلانے کے مقدمہ شامل ہے۔ عدالت نے ان مقدمات میں بانی پی ٹی آئی کے سیکیورٹی گارڈ اور عائشہ بھٹہ کو 10،10 سال جبکہ عالیہ حمزہ اور صنم جاوید کو 5، 5 سال قید کی سزا کا حکم سنایا۔ عدالت سے بری ہونیوالے ملزمان میں سلمان احمد، عبدالقادر، فیضان، طیب سلطان، شاہد بیگ، ماجد علی، بخت رواں، سہیل خان، اویس، رفیع الدین اور فرید خان شامل ہیں۔ فاضل جج کی جانب سے کوٹ لکھپت جیل میں یہ فیصلہ سنایا گیا، تھانہ شادمان نذر آتش کیس میں 19 ملزمان کا ٹرائل مکمل کیا گیا، ملزموں میں شاہ محمود قریشی، یاسمین راشد، عمر سرفراز چیمہ، اعجاز چودھری، میاں محمود الرشید، صنم جاوید اور عالیہ حمزہ شامل ہیں۔ تھانہ شادمان نذر آتش کیس میں کل 41 ملزم نامزد ہیں جبکہ 15 ملزم اشتہاری قرار دیئے جا چکے ہیں، تھانہ شادمان نذر آتش کیس میں 6 ملزمان زیر حراست جبکہ ایک ملزم وفات پا چکا ہے، ملزمان کے خلاف دہشت گردی سمیت دیگر دفعات کے تحت مقدمہ درج ہے۔ دوسری جانب بیکری کے باہر گاڑیاں جلانے کے مقدمے کا ٹرائل کوٹ لکھپت جیل میں مکمل کیا گیا، ملزمان میں شاہ محمود قریشی، یاسمین راشد شامل ہیں، بیکری کے باہر گاڑیاں جلانے کے مقدمے میں عمر سرفراز چیمہ، اعجاز چودھری، میاں محمودالرشید، عالیہ حمزہ اور صنم جاوید بھی شامل ہیں۔ گاڑیاں جلانے کے مقدمے میں کل 25 ملزم نامزد ہیں جبکہ 7 ملزم اشتہاری قرار دیئے جا چکے ہیں، بیکری کے باہر گاڑیاں جلانے کے مقدمے میں 12 ملزموں کا ٹرائل مکمل کیا گیا، بیکری کے باہر گاڑیاں جلانے کے مقدمے میں 5 ملزم زیر حراست جبکہ ایک ملزم وفات پا چکا ہے، ملزموں کے خلاف دہشت گردی سمیت دیگر دفعات کے تحت مقدمات درج ہیں۔ یاد رہے کہ لاہور میں اب تک نو مئی کے تین مقدمات کا فیصلہ سنایا جاچکا ہے، دو مختلف ججز نے تین مقدمات میں 31 ملزمان کو سزائیں سنائی ہیں، 9 مئی کے تین مقدمات میں اب تک 26 ملزمان کو بری کیا جاچکا ہے، شاہ محمود قریشی نو مئی کے تین مقدمات میں بری ہو چکے ہیں جبکہ ان کے خلاف ابھی تک نو مئی کے لاہور میں 11 مقدمات زیر سماعت ہیں۔