آئی ٹی، سیاحت کے شعبوں میں آسٹریلوی سرمایہ کاروں کیلئے گرانقدرمواقع ہیں: وزیراعلیٰ

08-08-2025

(لاہور نیوز) وزیراعلیٰ پنجاب مریم نواز شریف نے شاندار خدمات کے اعتراف پر آسٹریلین ہائی کمشنر نیل ہاکنز کو خراج تحسین پیش کیا۔

وزیراعلیٰ پنجاب مریم نواز شریف سے لاہور میں آسٹریلین ہائی کمشنر نیل ہاکنز کی الوداعی ملاقات ہوئی، ملاقات میں ٹیکسٹائل، معدنیات اور آئی ٹی خدمات میں تجارت کو وسعت دینے پر تبادلہ خیال کیا گیا۔ اس موقع پر وزیراعلیٰ پنجاب مریم نواز شریف نے کہا کہ پاکستان اور آسٹریلیا کے باہمی روابط اور دوطرفہ تعلقات خاص اہمیت کے حامل ہیں، ایس آئی ایف سی کے تحت سرمایہ کاری، ٹیکنالوجی منتقلی اور دیرپا شراکت داری کو فروغ دیا جا رہا ہے، آسٹریلیا اور پاکستان زراعت اور لائیو سٹاک میں بھی باہمی تعاون کی پالیسی پر عمل پیرا ہیں۔ وزیراعلیٰ پنجاب کا کہنا تھا کہ ایکوا کلچر، فشریز کی امپورٹ کیلئے کولڈ چین لاجسٹکس کے فروغ کیلئے پر امید ہیں، آسٹریلوی ایگریکلچر مشن کا گزشتہ جولائی میں پاکستان کا دورہ ایگری ٹریڈ میں گہرے تعاون کا استعارہ ہے، آسٹریلیا میں پنجاب سے ہزاروں افراد نے ترقی کے مواقع ہی نہیں بلکہ باہمی روابط کو بھی فروغ دیا۔ وزیراعلیٰ مریم نواز شریف نے کہا کہ پاکستان کی آسٹریلیا کے ساتھ بڑھتی ہوئی سٹریٹجک شراکت داری میں پنجاب بھی شامل ہے، ماحولیاتی تبدیلی کے مشترکہ عالمی چیلنج سے نمٹنے کیلئے پاکستان اور آسٹریلیا تعاون کی پالیسی پر عمل پیرا ہیں، آسٹریلیا پاکستانی طلبہ کیلئے اہم منزل ہے۔ انہوں نے کہا کہ پاکستان آسٹریلیا کے ساتھ باہمی احترام اور دیرپا دوستی کی بنیاد پر قائم مضبوط تعلقات کی قدر کرتا ہے، آسٹریلیا کے ساتھ دوستانہ تعلقات کو قدر کی نگاہ سے دیکھتے ہیں، پاکستان اور آسٹریلیا کے درمیان پارلیمانی روابط اور اقتصادی تعاون میں اضافہ ضروری ہے، پنجاب میں آئی ٹی اور سیاحت کے شعبوں میں آسٹریلوی سرمایہ کاروں کیلئے گراں قدر مواقع موجود ہیں۔ ان کا مزید کہنا تھا کہ حکومت پنجاب سرمایہ کاری کے فروغ کیلئے ہر ممکنہ معاونت کرے گی، بارش کے پانی کا ہر قطرہ بچا کر استعمال میں لانا چاہتے ہیں جس کے لئے ضروری اقدامات کر رہے ہیں، اپنے صوبے اور ملک میں مینارٹی کے جان و مال کا تحفظ اہم فریضہ سمجھتے ہیں، پاکستان معدنی وسائل سے مالا مال سرزمین ہے، بہتر استعمال یقینی بنانا چاہتے ہیں، تجاوزات کے خاتمے کے لئے یکسو ہیں، شہروں کی خوبصورتی بحال کر رہے ہیں۔ آسٹریلوی ہائی کمشنر نیل ہاک نے کہا کہ آسٹریلیا اورپاکستان بااعتماد دوست اور اہم اقتصادی شراکت دار ہیں۔