گھر بیٹھے گاڑیوں کے پرکشش نمبروں کیلئے ای آکشن سسٹم کا آغاز

08-08-2025

(لاہور نیوز) گھر بیٹھے گاڑیوں کے پرکشش نمبروں کیلئے ای آکشن سسٹم کا آغاز ہو گیا۔

30 اگست تک شہری اپنے پسندیدہ گاڑی کے نمبروں کے حصول کے لئے ای آکشن ایپ اور ویب پورٹل پر رجسٹریشن کروا سکتے ہیں، اس انقلابی سسٹم کی مدد سے اب شہری اپنی پسند کے نمبروں کی نیلامی میں گھر بیٹھے حصہ  لے سکیں گے، جس سے نہ صرف ان کی سہولت میں اضافہ ہو گا بلکہ کرپشن اور ایجنٹ کلچر کا خاتمہ بھی ممکن ہو گا۔ ای آکشن سسٹم کو پنجاب آئی ٹی بورڈ اور محکمہ ایکسائز پنجاب نے مشترکہ طور پر متعارف کروایا ہے، اس میں موٹرسائیکل اور موٹرکار کے نمبروں کی نیلامی شامل ہے اور بولی جیتنے والوں کی تفصیلات ای آکشن ایپ پر شفاف طور پر دستیاب ہوں گی۔ چیئرمین پنجاب آئی ٹی بورڈ فیصل یوسف نے اس اقدام کو شفافیت اور شہریوں کی سہولت کی بہترین مثال قرار دیتے ہوئے کہا کہ ای آکشن نظام  نے روایتی پیچیدگیوں کا خاتمہ کر دیا ہے، اب شہری اپنے پسندیدہ نمبروں کے لئے آسان طریقے سے رجسٹریشن کروا سکتے ہیں اور موبائل ایپ یا ویب پورٹل کے ذریعے نیلامی میں حصہ  لے سکتے ہیں۔ انہوں  نے مزید کہا کہ یہ سسٹم کرپشن اور ایجنٹ کلچر کے خاتمے میں مؤثر ثابت ہوا ہے، عوام اب بغیر کسی پریشانی کے گھر بیٹھے بولی میں حصہ  لے سکتے ہیں۔