شہر میں مون سون بارشوں نے پارکوں کی حالت بگاڑ دی

08-07-2025

(لاہور نیوز) شہر میں مون سون بارشوں نے پارکوں کی حالت بگاڑ دی، پارکس میں کیچڑ اور مچھروں کا خطرہ بڑھ گیا۔

مون سون بارشوں  نے شہر بھر میں پارکوں اور گرین بیلٹس کی حالت خراب کر دی ہے اور خاص طور پر چائنہ سکیم کے پارکس میں بارش کے پانی اور کیچڑ  نے مقامی رہائشیوں کیلئے مشکلات کھڑی کر دی ہیں۔ ان پارکس اور گرین بیلٹس کے اطراف گندے پانی کے جوہڑ بننے سے مچھروں کی افزائش کا خدشہ بڑھ گیا ہے، جس سے مختلف بیماریوں کے پھیلنے کا خطرہ پیدا ہو گیا ہے۔ مقامی شہریوں کا کہنا ہے کہ بارشوں کے بعد نکاسی آب کے مناسب انتظامات نہ ہونے کی وجہ سے یہ صورتحال مزید بدتر ہو گئی ہے، انہوں نے اس بات پر بھی تشویش کا اظہار کیا ہے کہ شکایات کے باوجود متعلقہ حکام  نے اس مسئلے کو حل کرنے کیلئے کوئی ٹھوس اقدامات نہیں کئے۔ شہریوں کا کہنا ہے کہ جب بارشوں کا سلسلہ جاری رہتا ہے، تو یہ گندہ پانی مختلف پارکوں میں جمع ہو جاتا ہے جس سے نہ صرف پارکوں کی خوبصورتی متاثر ہوتی ہے بلکہ علاقے میں مچھروں کی افزائش بھی بڑھ جاتی ہے۔ علاقہ مکینوں کا یہ بھی کہنا ہے کہ پارکوں کے اطراف کی صفائی کا مناسب انتظام نہ ہونے سے جگہ جگہ گندے پانی کے جوہڑ بن گئے ہیں، جو کہ صحت کے لئے انتہائی خطرناک ہیں۔