مرغی کا گوشت 20 روپے مہنگا، سبزی، پھلوں میں بھی گرانفروشوں کا راج

08-06-2025

(لاہور نیوز) سستی پروٹین کا ذریعہ غریب کی پہنچ سے دور ہو گیا، برائلر کے دام عدم استحکام کا شکار ہیں۔

مرغی کا گوشت 20 روپے بڑھ کر 560 روپے کا کلو ہو گیا، زندہ برائلر کی قیمت میں بھی 14 روپے کا اضافہ ہوا، ہول سیل ریٹ 373 روپے اور پرچون میں 387 روپے کلو مقرر ہے۔ انڈوں کی قیمت میں بھی روزبروز اضافہ دیکھنے میں آیا، انڈے ایک روپیہ اضافے سے 281 روپے کے درجن ہو گئے، پیٹی 8 ہزار 310 روپے میں فروخت ہو رہی ہے۔ دوسری جانب شہر کی منڈیوں میں گرانفروشوں کا راج برقرار ہے، سبزیوں اور پھلوں کی قیمتوں میں خودساختہ اضافہ جاری ہے۔ پیاز 100، ٹماٹر 120، لہسن 380، ادرک 580، سبز مرچ 160، لیموں 400 روپے کلو میں فروخت ہونے لگے، ٹینڈے 350، کریلے اور گوبھی 200، شلجم 150، بھنڈی 230، شملہ مرچ 260، گھیاکدو 300 روپے کا کلو ہو گیا۔  پھلوں میں کیلا 250 روپے کا درجن، پپیتا 550، سیب، آڑو اور خوبانی 380، آم 350، ناشپاتی 280 روپے کلو میں دستیاب ہے۔