صوبائی کابینہ کا اجلاس، صنعتی ورکرز کیلئے 1220 فلیٹس دینے کی منظوری

08-05-2025

(لاہور نیوز) صوبائی کابینہ کے اجلاس میں صنعتی ورکرز کیلئے 1220 فلیٹس دینے کی منظوری دیدی گئی۔

وزیراعلیٰ پنجاب مریم نواز کی زیر صدارت صوبائی کابینہ کا 28 واں اجلاس ہوا، کابینہ اجلاس میں 130 نکاتی ایجنڈے کی منظوری دیدی گئی اور اہم امور پر غور کیا گیا، صوبائی وزراء، مشیران اور معاونین خصوصی سمیت دیگر  نے اجلاس میں شرکت کی۔ اجلاس میں پنجاب میں صنعتی ورکرز کیلئے فلیٹس دینے کی منظوری دی گئی، لیبر کمپلیکس سندر، قصور، لیبر کالونی ٹیکسلا میں ورکرز کو قرعہ اندازی کے ذریعے فلیٹس ملیں گے، ورکرز سے فلیٹس کی قیمت وصول کرنے کی تجویز مسترد کر دی گئی۔ کابینہ اجلاس میں سرکاری زمین پر ٹیلی کام ٹاورز کیلئے لیز کی منظوری زیر غور آئی، “چائلڈ لیبر” کی روک تھام سے متعلق قواعد 2024 کے مسودے پر بھی غور کیا گیا، پنجاب چیریٹی کمیشن میں بھرتیوں پر پابندی ختم کرنے کی تجویز زیر غور رہی۔  صوبائی کابینہ  نے اجلاس میں ملازمین کی بیواؤں کو تاحیات پنشن دینے کی منظوری دیدی، جیلوں میں قیدیوں کیلئے باقاعدہ انڈسٹری قائم کرنے کا حکم بھی دیا گیا، فلڈ ڈیوٹی سرانجام دینے والے ریسکیو اہلکاروں کیلئے 50، 50 ہزار روپے انعام کا اعلان کیا گیا، صوبائی کابینہ نے ورکرز کی تنخواہ یکساں طور پر 40 ہزار کرنے کی منظوری بھی دی۔