والدین بچیوں کو ڈگریاں لینے کے بعد گھرمیں نہ بٹھائیں، ملکی ترقی میں کردارادا کریں: گورنر پنجاب

08-05-2025

(لاہور نیوز) گورنر پنجاب سردار سلیم حیدر خان نے کہا ہے کہ والدین بچیوں کو پڑھانے لکھانے اور اتنی ڈگریاں حاصل کرنے کے گھروں میں نہ بٹھائیں بلکہ باہر نکل کر اپنی صلاحیتوں سے ملک کی ترقی میں اپنا کردار ادا کریں۔

گورنر پنجاب سردار سلیم حیدر خان سے وومن چیمبر آف کامرس اینڈ انڈسٹری گجرات کے وفد نے ملاقات کی۔ ملاقات میں ملکی معیشت اور کاروباری معاملات میں خواتین کے کردار پر تبادلہ خیال کیا۔ صدر وومن چیمبر گجرات صائمہ سرفراز اور تاجر رہنما وقار ایوب بٹ نے وفد کی قیادت کی۔ گورنر پنجاب نے گفتگو کرتے ہوئے کہا کہ ملک کی معاشی دوڑ میں خواتین بڑھ چڑھ کر حصہ لے رہی ہیں ، سیاست، تجارت اور زندگی کے ہر شعبے میں خواتین نے اپنا لوہا منوایا، پیپلزپارٹی نے ہمیشہ اپنے دور اقتدار میں خواتین کے لیے سرکاری ملازمت میں کوٹہ رکھا اور روزگار کے مواقع فراہم کئے۔ سردار سلیم حیدر نے کہا کہ خواتین کی ہراسمنٹ کے خلاف حکومت زیرو ٹالرنس اختیار کیے ہوئے ہے، پاکستان کی پڑھی لکھی خواتین کو معاشرے میں آگے آکر ملک کی باگ ڈور میں اپنا کردار ادا کرنا چاہیے۔ انہوں نے کہا کہ ہمارے ملک کی سیاست میں محترمہ فاطمہ جناح، بے نظیر بھٹو ایک مثال ہیں، خواتین کاروباری وتجارتی سرگرمیوں میں عملی طور پر حصہ لیں تاکہ خواتین کو بااختیار بنایا جائے ۔  گورنر کا کہنا ہے کہ صدر پاکستان آصف زرداری کے حکم کے مطابق گورنر ہاؤس کے دروازے تاجر برادری کے مسائل حل کرنے کے لیے ہر وقت کھلے ہیں ،میرا خواتین کو معاشی طور پر بااختیار بنانے اور معاشرے میں باعزت مقام دلانے کے لیے بھرپور تعاون رہے گا ۔