گوالمنڈی: اغوا شدہ 15 سالہ لڑکی بازیاب، ملزم گرفتار

08-05-2025

(لاہور نیوز) گوالمنڈی چوکی میو ہسپتال پولیس نے بروقت کارروائی کرتے ہوئے اغوا کے مقدمے میں مطلوب 15 سالہ لڑکی کو بحفاظت بازیاب کروا لیا، جبکہ ملزم کو موقع پر ہی گرفتار کر لیا گیا۔

ترجمان پولیس کے مطابق متاثرہ لڑکی شفیق آباد کی رہائشی ہے جو روزمرہ کا سودا سلف لینے کے لئے گھر سے نکلی تھی، مگر واپس نہ آئی، ورثاء کی جانب سے تلاش کے بعد تھانہ شفیق آباد میں اغوا کا مقدمہ درج کروایا گیا۔ ایس پی سٹی کی خصوصی ہدایت پر فوری طور پر ایک پولیس ٹیم تشکیل دی گئی جس نے جدید تکنیکی ذرائع اور انٹیلی جنس کی مدد سے کارروائی کرتے ہوئے لڑکی کو بحفاظت بازیاب کروا لیا، پولیس کے مطابق ملزم عظیم نامی شخص  لڑکی کو ورغلا کر اپنے ساتھ لے گیا تھا۔ ملزم سے ابتدائی تفتیش جاری ہے اور مزید انکشافات کی توقع ہے۔ بیٹی کے بحفاظت واپس آنے پر ورثا نے پولیس کی کاوشوں کو سراہا، ان کا شکریہ ادا کیا اور ان کے حق میں دعائیں کیں۔