تربیلا ڈیم 94 فیصد اور منگلا ڈیم 61 فیصد بھر چکا ہے، پی ڈی ایم اے

08-05-2025

(لاہور نیوز) پی ڈی ایم اے نے کہا کہ تربیلا ڈیم 94 فیصد جبکہ منگلا ڈیم 61 فیصد تک بھر چکا ہے، تربیلا ڈیم کا موجودہ سطحِ آب 1544.00 فٹ ہے جبکہ اس کی زیادہ سے زیادہ گنجائش 1550.00 فٹ ہے۔

رپورٹ کے مطابق منگلا ڈیم کا موجودہ لیول 1203.25 فٹ ریکارڈ کیا گیا ہے، جو اس کی زیادہ سے زیادہ گنجائش 1242.00 فٹ کے 61 فیصد کے برابر ہے، دونوں ڈیموں میں پانی کی موجودہ سطح مون سون سیزن کے دوران ممکنہ ضرورتوں کو مدنظر رکھتے ہوئے تسلی بخش قرار دی جا رہی ہے۔ پی ڈی ایم اے کے ترجمان کے مطابق دریائے سندھ میں تربیلا کے مقام پر اس وقت نچلے درجے کا سیلاب ہے تاہم صورتحال قابو میں ہے، دوسری جانب دریائے چناب، جہلم، راوی اور ستلج میں اہم مقامات پر پانی کا بہاؤ معمول کے مطابق ہے۔ پی ڈی ایم اے پنجاب کا مزید کہنا ہے کہ دریائے چناب اور راوی کے ملحقہ برساتی نالوں میں بھی پانی کا بہاؤ معمول کے مطابق ہے، جبکہ کوہِ سلیمان اور ڈیرہ غازی خان ڈویژن کے پہاڑی ندی نالوں میں فی الحال کوئی بہاؤ ریکارڈ نہیں کیا گیا۔ انتظامیہ نے صورت حال پر مکمل نظر رکھنے کی یقین دہانی کراتے ہوئے عوام کو ہدایت کی ہے کہ وہ موسمیاتی تبدیلیوں  سے باخبر رہیں اور کسی بھی ہنگامی صورت میں متعلقہ حکام سے فوری رابطہ کریں۔