پی ایچ ایف نے پرو ہاکی لیگ میں شرکت کے فیصلے کیلئے وقت مانگ لیا

08-04-2025

(لاہور نیوز) صدر پاکستان ہاکی فیڈریشن طارق بگٹی نے کہا ہے کہ پاکستان ہاکی فیڈریشن نے ایف آئی ایچ سے پرو لیگ میں شرکت کے فیصلے کے لیے وقت مانگ لیا ہے۔

لاہور میں میڈیا سے گفتگو کرتے ہوئے انھوں نے کہا کہ پرولیگ کے حوالے سے حکومت سے بات چیت جاری ہے جلد اچھی خبر آ ئے گی، ایف آئی ایچ  نے 12 اگست تک کی ڈیڈ لائن دی تھی۔ انہوں نے کہا کہ پرو ہاکی لیگ میں شرکت سے کھلاڑیوں کو ایکسپوژر ملے گا اور ٹیم کی رینکنگ بہتر ہو گی، پرو ہاکی لیگ کے لیے 35 کروڑ روپے کا بجٹ بنا کر بھیجا ہے۔ طارق بگٹی نے کہا پرو ہاکی لیگ سمیت سال بھر کے دیگر ایونٹس کے لیے 70 کروڑ روپے درکار ہوں گے، ایشیا کپ کے لیے بھارت جانے کا فیصلہ حکومت کو کرنا ہے، حکومت پاکستان جو فیصلہ کرے گی ہم اس کے مطابق چلیں گے۔ بھارت کی جانب سے اس وقت بہت چیزیں چل رہی ہیں، انگلینڈ میں جو رویہ دکھایا گیا وہ مثبت نہیں، وقت کم ضرور ہے لیکن ہمارے کھلاڑی پریکٹس میں ہیں۔ انہوں نے مزید کہا کہ ہمارے بھارت میں کھیلنے کے حوالے سے خدشات ہیں، ہم چاہتے ہیں کہ پہلے ہمارا وفد بھارت جائے اور وہ وہاں کے حالات دیکھے، پھر ہم کوئی فیصلہ کریں۔