پنجاب میں امن شہداء کی قربانیوں کی بدولت ہے: چیف سیکرٹری

08-04-2025

(لاہور نیوز) چیف سیکرٹری پنجاب زاہد اختر زمان نے کہا ہے کہ صوبہ میں امن شہداء کی قربانیوں کی بدولت ہے۔

چیف سیکرٹری پنجاب زاہد اختر زمان کا یوم شہداء پولیس کی تقریب سے خطاب کرتے ہوئے کہنا تھا کہ اعداد و شمار کے مطابق صوبہ میں امن و امان کی صورتحال مثالی ہے، وزیراعلیٰ پنجاب مریم نواز  نے تمام سرکاری ملازمین کی فلاح و بہبود کو ہمیشہ نہایت اہم سمجھا ہے۔ چیف سیکرٹری پنجاب نے کہا کہ ڈھائی سال قبل عہدے کا چارج سنبھالا تو آئی جی ڈاکٹر عثمان انور  نے پولیس شہداء کی ویلفیئر کے اقدامات زیر التواء ہونے سے متعلق آگاہ کیا، پولیس شہداء کے اہلخانہ کیلئے کئے گئے تمام اقدامات کا کریڈٹ محسن نقوی اور وزیراعلیٰ پنجاب مریم نواز کو جاتا ہے۔ چیف سیکرٹری پنجاب زاہد اختر زمان کا مزید کہنا تھا کہ یوم شہداء پولیس کی تقریب میں شرکت باعث اعزاز ہے، پنجاب حکومت شہداء پولیس کی ویلفیئر کے اقدامات کیلئے ہر ممکن تعاون جاری رکھے گی۔