شہر اور گردونواح میں موسلادھار بارش، نشیبی علاقے زیر آب، متعلقہ ادارے الرٹ

08-03-2025

(لاہور نیوز) صوبائی دارالحکومت اور گردونواح میں تیز ہواؤں کے ساتھ موسلادھار بارش،نشیبی علاقے زیر آب آگئے، متعلقہ اداروں کو الرٹ کر دیا گیا۔

شہر میں مال روڈ ، ہال روڈ ، جیل روڈ ، ایبٹ روڈ ،کینال روڈ، قرطبہ چوک، نشتر ٹاؤن، فرخ آباد سمیت دیگر علاقوں میں موسلادھار بارش ریکارڈ کی گئی۔ موسلادھار طوفانی بارش سے شہر کے کئی علاقے زیر آب آگئے، شملہ پہاڑی کے گردونواح میں بیشتر علاقے پانی میں ڈوب گئے، طوفانی بارش سے بادل برسٹ کر گئے، جس کی وجہ سے ہر طرف پانی ہی پانی جمع ہوگیا ہے، لاہور کے کئی علاقوں میں بارشوں نے نظام زندگی مفلوج کر دیا ہے۔ محکمہ موسمیات کے مطابق اڑھائی گھنٹے کے دورانیہ میں اوسطا 40.4 ملی میٹر بارش ریکارڈ کی گئی۔ شہر میں سب سے زیادہ بارش پانی والا تالاب میں  89 ملی میٹر  ریکارڈ ہوئی۔ جیل روڈ پر  45، ایئرپورٹ 89، گلبرگ  49 ،لکشمی چوک 72، اپر مال 29، مغلپورہ 30 اور تاج پورہ میں 47 ملی میٹر بارش ریکارڈ کی گئی۔ نشتر ٹاؤن 40 ، چوک ناخدا 57، فر خ آباد 45 ،گلشن راوی، جوہر ٹاؤن اور اقبال ٹاؤن میں 3،3 ملی میٹر ،سمن آباد 2 اور قرطبہ چوک میں 43 ملی میٹر بارش برسی۔ شہر میں موسلا دھار بارش کے باعث شہر کے نشیبی علاقوں میں پانی جمع ہو گیا، پی ڈی ایم اے نے متعلقہ اداروں کو الرٹ رہنے کی ہدایت جاری کر دی۔ فیروزوالہ اور گردو نواح میں بھی خوب جم کر بادل برسے، جس سے موسم خوشگوار اور حبس کا خاتمہ ہو گیا ہے۔