قاسم ، سلیمان غیرملکی شہری، پاکستان میں انتشار پھیلانے کی اجازت نہیں دینگے: عظمیٰ بخاری

08-02-2025

(لاہور نیوز) وزیر اطلاعات پنجاب عظمیٰ بخاری کا کہنا ہے کہ علیمہ خانم کو بھی اپنے بھائی کی طرح تسلسل سے جھوٹ بولنے کی عادت پڑ گئی ہے، قاسم اور سلیمان غیر ملکی شہری ہیں، انکو پاکستان میں انتشار پھیلانے کی اجازت نہیں ملے گی۔

وزیر اطلاعات پنجاب عظمیٰ بخاری نے اپنے ایک بیان میں کہا کہ علیمہ خانم کبھی کہتی قاسم و سلیمان پاکستان آرہے کبھی کہتی نہیں آرہے، کبھی کہتی ان کو والدہ نے اجازت نہیں دی، کبھی کہتی انکو ویزہ نہیں مل رہا۔ عظمیٰ بخاری نے کہا کہ وہ جن کے بچے ہیں پہلے ان سے پوچھ لیں وہ آنے کی اجازت دے رہے یا نہیں؟ کبھی کہتی ہیں نائکوپ ہے وہ پاکستانی ہیں،کبھی ویزے مانگنے کی بات کرتی ہیں، جب بچوں کے والد،والدہ سوئم اور فسادیوں کا گروہ انقلاب نہیں لاسکے تو قاسم اور سلیمان کیا تیرمارلیں گے؟ وزیراطلاعات نے کہا کہ قاسم اور سلیمان امریکہ سیر سپاٹے کرنے گئے تھے وہ گھوم پھر کے واپس لندن پہنچ گئے ہیں، اگر وہ اپنے والد سے ملنا چاہتے ہیں تو شوق سے آئیں انکو کوئی نہیں روکے گا، ہاں البتہ اگر وہ انتشار پھیلانے آتے ہیں تو اس کی ان کو اجازت نہیں ملے گی کیونکہ وہ غیرملکی شہری ہیں، اگر غیر ملکی بچوں نے ہی تحریک چلانی ہے تو یہاں موجود پی ٹی آئی قیادت کو شرم ضرور آنی چاہیے۔