میٹرک کے ہزاروں طلبا و طالبات رزلٹ کارڈ کے حصول کیلئے پریشان

07-30-2025

(لاہور نیوز) میٹرک کے ہزاروں ریگولر طلبا و طالبات رزلٹ کارڈ کے حصول کیلئے شدید مشکلات کا شکار ہیں۔

تعلیمی بورڈ کی جانب سے تاحال ریگولر طلبہ کو رزلٹ کارڈ جاری نہیں کئے جا سکے، جس کے باعث طلبہ کو کالجوں میں داخلے کے لئے فارم جمع کروانے میں دشواریوں کا سامنا ہے۔ ریگولر طلبا و طالبات اپنے متعلقہ سرکاری و نجی سکولوں کے چکر کاٹنے پر مجبور ہیں، لیکن رزلٹ کارڈ نہ ملنے کے باعث انہیں مایوسی کا سامنا کرنا پڑ رہا ہے۔ یاد رہے کہ میٹرک کے نتائج کا اعلان 24 جولائی کو کیا گیا تھا، تاہم ایک ہفتہ گزرنے کے باوجود رزلٹ کارڈ جاری نہیں کئے جا سکے۔ سکول سربراہان  نے تعلیمی بورڈ سے مطالبہ کیا ہے کہ رزلٹ کارڈز جلد از جلد فراہم کئے جائیں تاکہ طلبہ کا تعلیمی سفر متاثر نہ ہو۔ دوسری جانب بورڈ حکام کا کہنا ہے کہ رزلٹ کارڈز کی پرنٹنگ کا عمل تیزی سے جاری ہے اور ایک سے دو روز میں تمام رزلٹ کارڈز سکولوں کو بھیج دیئے جائیں گے۔