علامہ اقبال ایکسپریس کے ذریعے سمگلنگ کی کوشش ناکام، بھاری مقدار میں منشیات برآمد

07-29-2025

(لاہور نیوز) ریلویز پولیس نے بروقت کارروائی کرتے ہوئے منشیات سمگلنگ کی کوشش ناکام بنا دی۔

ترجمان پاکستان ریلویز پولیس کے مطابق  ڈیوٹی پر موجود سب انسپکٹر محمد اکرام نے 2 خواتین کو شک کی بنیاد پر روکا، جس کے بعد ان کے سامان کی تلاشی لیڈی پولیس اہلکار نے لی اور چیکنگ کے دوران خواتین کے ہینڈ بیگز سے بھاری مقدار میں منشیات برآمد ہوئی۔ ملزمہ ثمرین کے بیگ سے 5.5 کلو اور ثوبیہ کے بیگ سے 4.4 کلوگرام چرس نکلی۔ دونوں خواتین کا تعلق بنوں سے ہے اور وہ یہ منشیات بنوں سے بذریعہ بس لاہور لائی تھیں۔ ابتدائی تفتیش میں انکشاف ہوا ہے کہ دونوں خواتین چرس کو علامہ اقبال ایکسپریس کے ذریعے کراچی سمگل کرنے کا منصوبہ رکھتی تھیں، تاہم ریلویز پولیس کی مستعدی نے ان کے اس منصوبے کو ناکام بنا دیا۔ گرفتاری کے بعد دونوں خواتین کے خلاف تھانہ ریلویز پولیس لاہور میں 2 علیحدہ مقدمات درج کر لیے گئے ہیں اور مزید تفتیش جاری ہے۔  ترجمان کے مطابق ڈی آئی جی نارتھ نے منشیات کی سمگلنگ ناکام بنانے پر پوری ٹیم کو شاباش دی ہے۔