ستھرا پنجاب پروگرام: صوبے بھرمیں مزید 136 ویسٹ ڈسپوزل پوائنٹس بنانے پر اتفاق

07-27-2025

(لاہور نیوز) وزیراعلیٰ مریم نواز شریف کی زیر صدارت اجلاس میں پنجاب بھر میں مزید 136 ویسٹ ڈسپوزل پوائنٹس بنانے پر اتفاق کیا گیا ہے۔

وزیراعلیٰ مریم نواز شریف کی زیر صدارت اجلاس میں ستھرا پنجاب پروگرام  کے بارے میں تفصیلی بریفنگ دی گئی۔ اجلاس میں بتایا گیا کہ عالمی بینک،یورپ سمیت دیگر ممالک کے ترقیاتی اداروں نے ستھرا پنجاب میں سرمایہ کاری کیلئے دلچسپی کا اظہار کیا ہے ۔ اجلاس میں وہیکل ٹرپ کاؤنٹنگ سسٹم،وہیکل ٹریکنگ مینجمنٹ سسٹم کے بارے میں بتایا گیا۔ ستھرا پنجاب پراجیکٹ کے تحت پہلی مرتبہ ای انوائس اورسینی ٹیشن فیس کی ای بلنگ پر بریفنگ دی گئی۔ اس سلسلے میں پنجاب بھر میں مزید 136 ویسٹ ڈسپوزل پوائنٹس بنانے پر اتفاق کیا گیا۔ وزیراعلیٰ مریم نواز شریف نے اجلاس میں گفتگو کرتے ہوئے کہا کہ ستھرا پنجاب پروگرام کامیابی سے جاری ہے،چند اضلاع میں صفائی کے بارے میں شکایات کا ازالہ کریں گے، ستھرا پنجاب پراجیکٹ میں درست کام نہ کرنے والے کنٹریکٹر کو نکال باہر کیا جائے، ہر گلی محلے میں صفائی اورعملہ مستقل طورپر نظر آنا چاہیے۔ مریم نواز نے کہا کہ لوگوں کی بڑھتی ہوئی توقعات کی طرح پرفارمنس کو بھی بڑھانا ہے، سیف سٹی کیمروں کو پنجاب بھر میں صفائی کی صورتحال جانچنے کیلئے استعمال کیا جائے۔