نیب نے پراپرٹی بزنس میں فراڈ کی روک تھام کیلئے جدید نظام تیار کر لیا

07-25-2025

(ویب ڈیسک) قومی احتساب بیورو (نیب) نے ملک بھر میں پراپرٹی اور ہاؤسنگ سیکٹر فراڈ کی روک تھام اور شفاف خرید و فروخت کے لیے جدید ترین آن لائن نظام تیار کر لیا ہے۔

چیئرمین نیب جلد اس آن لائن نظام کا افتتاح کریں گے، نئے سسٹم سے ملک بھر میں پلاٹس کا ریکارڈ ڈیجیٹل پلیٹ فارم پر دستیاب ہوگا، پلاٹ یا سوسائٹی کی قانونی حیثیت، این او سی، نقشہ، مالکان کی تفصیلات، تصدیق شدہ رپورٹ خرید و فروخت کیلئے استعمال ہو گی۔ نیب حکام کا کہنا ہے کہ پورے پاکستان میں پراپرٹی کا مکمل ریکارڈ اس ڈیجیٹل پورٹل پر موجود ہوگا اور صرف پلاٹ نمبر کے ذریعے کسی بھی پلاٹ کی تصدیق کرکے قانونی دستاویز کے طور خرید و فروخت کے لیے استعمال کیا جا سکے گا۔ نیب کے مطابق اس سسٹم کا مقصد نا صرف شہریوں کو جعلسازی سے بچانا ہے بلکہ ہاؤسنگ سکیمز میں اوور سیلنگ، جعلی فائلز اور غیر قانونی زمینوں کی خرید و فروخت جیسے سنگین جرائم کا خاتمہ بھی ہے۔