پی ٹی آئی رہنما شبلی فراز کے ناقابل ضمانت وارنٹ گرفتاری

07-25-2025

(لاہور نیوز) پاکستان تحریک انصاف (پی ٹی آئی) کے رہنما شبلی فراز کے ناقابل ضمانت وارنٹ گرفتاری جاری کر دیئے گئے۔

لاہور کینٹ کچہری میں بانی پی ٹی آئی عمران خان کی رہائش گاہ کے باہر اسلام آباد پولیس پر حملے سے متعلق مقدمے کی سماعت ہوئی، عدالت نے شبلی فراز کے ناقابلِ ضمانت وارنٹ گرفتاری جاری کر دیے اور رہنما پی ٹی آئی کو گرفتار کر کے عدالت پیش کرنے کا حکم دیا۔ مقدمے کی سماعت جوڈیشل مجسٹریٹ سہیل رفیق نے کی، عدالت نے اس حوالے سے تحریری فیصلہ بھی جاری کیا۔ عدالت نے اسی کیس میں بانی پی ٹی آئی کو بھی سمن جاری کر رکھے ہیں، جو عمران خان کے جیل میں قید ہونے کے باعث بذریعہ جیل روبکار بھجوائے گئے ، عدالت نے مقدمے کی آئندہ سماعت کیلئے 30 جولائی کی تاریخ مقرر کی ہے۔ واضح رہے کہ تھانہ ریس کورس پولیس نے اسلام آباد پولیس پر حملے کے الزام میں مقدمہ درج کر رکھا ہے۔