بھارتی کرکٹ بورڈ سے بات جیت جاری، ایشیا کپ کا جلد اعلان ہو جائیگا: محسن نقوی

07-24-2025

(ویب ڈیسک) ایشین کرکٹ کونسل کے صدر محسن نقوی کا کہنا ہے کہ بھارتی کرکٹ بورڈ سے بات چیت جاری ہے جلد سب کچھ حل ہو جائے گا، ایشیا کپ کا جلد اعلان ہو گا۔

ایشین کرکٹ کونسل کا سالانہ اجلاس ڈھاکا میں ختم ہو گیا، صدر اے سی سی محسن نقوی نے اجلاس کے شرکا کا شکریہ ادا کیا۔ انہوں نے خطاب میں کہا کہ بنگلا دیش کرکٹ بورڈ (بی سی بی) کی میزبانی کا شکریہ ادا کرتا ہوں، ہم نے فیصلہ کیا ہے کہ کرکٹ کے لیے کام کرنا ہے، اے سی سی کے اجلاس میں تمام 25 ارکان نے شرکت کی، سب کا شکریہ ادا کرتا ہوں۔ محسن نقوی نے کہا کہ یہ دو دن بڑے یادگار ہیں، کوئی بھی سیاست نہیں چاہتا، بڑے اچھے ماحول میں میٹنگ ہوئی، ایشیا کپ سے متعلق جلد فیصلہ ہو گا، یہ ٹیم ورک ہے ہم ایسی میٹنگز جاری رکھیں گے۔ صدر ایشین کرکٹ کونسل نے مزید کہا کہ کچھ لوگ ڈھاکا نہیں آ سکے، ایسا ہوتا ہے، میں بھی سنگاپور نہیں جاسکا تھا ، شیڈولڈ کی وجہ سے ایسا چلتا ہے، بڑی بات یہ ہے کہ تمام ممبران آئے، ابھی اعلان کا انتظار کریں ، بنگلا دیش بورڈ کے ساتھ بھی مختلف معاملات پر بات جاری ہے۔