ڈیفنس اور کاہنہ میں مبینہ پولیس مقابلے، 2 ملزمان ساتھیوں کی فائرنگ سے ہلاک

07-24-2025

(لاہور نیوز) صوبائی دارالحکومت میں سی سی ڈی کے دو مبینہ پولیس مقابلے، ڈیفنس اور کاہنہ میں دو زیر حراست ملزمان مقابلے کے دوران اپنے ہی ساتھیوں کی فائرنگ سے مارے گئے۔

ڈیفنس کے علاقے میں ہونے والے مبینہ پولیس مقابلے میں ایک ملزم ہلاک ہو گیا، مارے گئے ملزم کی شناخت انور ملنگی کے نام سے ہوئی ہے۔ سی سی ڈی ذرائع کے مطابق ہلاک ملزم کو اہلکار ریکوری کے لیے لے جا رہے تھے کہ اس دوران ملزمان کے ساتھیوں  نے پولیس ٹیم پر فائرنگ کر دی، فائرنگ کی زد میں آکر زیر حراست ملزم انور ملنگی ہلاک ہو گیا۔ ذرائع  نے بتایا کہ ہلاک ہونے والا ملزم تین درجن سے زائد وارداتوں میں ملوث تھا، جن میں ڈکیتی، چوری اور دیگر سنگین جرائم شامل ہیں۔ پولیس کا کہنا ہے کہ اس کارروائی میں ایک اور اہم مجرم کی گرفتاری کی راہ ہموار ہوئی ہے جس سے شہر میں جرائم کی شرح کو کنٹرول کرنے میں مدد ملے گی۔ کاہنہ کے علاقے جھیڈو گاؤں کے قریب دوسرے مبینہ پولیس مقابلے میں بھی زیر حراست ملزم اپنے ہی ساتھیوں کی فائرنگ سے ہلاک ہوگیا۔ پولیس ذرائع کے مطابق زیر حراست ملزم سلیم مسیح گلبرگ پولیس سٹیشن میں جسمانی ریمانڈ پر تھا، ملزم کو برآمد گی کے لئے جھڈو گاوں لایا گیا، جہاں خالی پلاٹ سے موٹرسائیکل برآمد کروائی گئی۔ پولیس واپس جانے لگی تو دو نامعلوم موٹرسائیکل سواروں نے فائرنگ کردی، نامعلوم موٹرسائیکل سواروں کی فائرنگ سے پولیس محفوظ رہی البتہ زیر حراست ملزم اپنے ہی ساتھیوں کی فائرنگ سے جاں بحق ہوگیا۔