لاہور ریجن میں 39 افراد کے پاس 198 شیر اور چیتے ہونے کا انکشاف

07-22-2025

(لاہور نیوز) وائلڈ لائف کی کارروائیوں کے دوران لاہور ریجن میں 39 افراد کے پاس 198 شیر اور چیتے ہونے کا انکشاف ہوا ہے۔

ڈپٹی چیف وائلڈ لائف رینجرز لاہور کے مطابق پنجاب وائلڈ لائف کی جانب سے بگ کیٹس رکھنے والوں کے خلاف کارروائیاں جاری ہیں تاہم اس دوران لاہور ریجن میں بگ کیٹس ڈکلیئر کرنے والوں کا سروے مکمل کر لیا گیا ہے۔ سروے کے مطابق لاہور ریجن میں 39 افراد نے 198 بگ کیٹس (شیر، ٹائیگر) ڈکلیئر کیے تھے، ڈپٹی چیف وائلڈ لائف رینجرز عدنان ورک کے مطابق غیر قانونی طور پر رکھی گئیں 15 بگ کیٹس قبضے میں لے لی گئی ہیں جبکہ بگ کیٹس ڈکلیئر کرنے والے تمام افراد کو نوٹس جاری کر دیئے گئے ہیں۔ حکام  نے بگ کیٹس رکھنے والے افراد کو ایس او پیز پر عمل درآمد کی ہدایت کی اور کہا کہ سہولیات بہتر بنانے کیلئے آپ کو 2 ماہ کا وقت دیا جاتا ہے۔