پی آئی اے نے برطانیہ سے پروازوں کی فوری اجازت مانگ لی

07-17-2025

(ویب ڈیسک) برطانیہ میں پاکستانی قومی ایئرلائن سے پابندی ہٹنے کے بعد اہم پیش رفت سامنے آئی ہے ۔

قومی ایئرلائن نے برطانیہ کی پروازوں کیلئے یو کے سول ایوی ایشن کو تحریری درخواست  دی ہے جس میں مانچسٹر کیلئے فوری پروازوں کی اجازت طلب کی گئی۔ ذرائع کے مطابق قومی ایئرلائن کو یوکے سول ایوی ایشن سے پروازوں کی اجازت آئندہ چند روز میں ملنے کا یقین ہے ۔ ذرائع کا کہنا ہے کہ ابتدائی طور قومی ایئرلائن اسلام آباد سے مانچسٹر کیلئے پروازیں چلائے گی جبکہ  لندن اور برمنگھم کی پروازوں کیلئے بعد میں یوکے سی اے اے کو تحریری درخواست دی جائے گی۔ واضح رہے کہ بدھ کو 5 سال بعد برطانیہ نے پاکستانی ایئرلائنز پر عائد پابندیاں ختم  کرتے ہوئے پاکستان کو اپنی ایئر سیفٹی لسٹ سے نکال دیا تھا۔ جس کے بعد اب تمام پاکستانی ایئرلائنز برطانیہ کے لیے پروازیں چلانے کی درخواست دے سکتی ہیں۔ ہرایئرلائن کو برطانیہ میں پرواز کے لیے یوکے سول ایوی ایشن اتھارٹی سے اجازت نامہ حاصل کرنا ہوگا۔