سیمنٹ اور سریا کی قیمتوں میں ہوشربا اضافہ

07-17-2025

(لاہور نیوز) ملک بھر میں سیمنٹ اور سریا کی قیمتوں میں حالیہ دنوں میں غیر معمولی اضافہ دیکھنے میں آیا ہے، جس نے تعمیراتی شعبے کو شدید متاثر کیا۔

 پاکستان میں تعمیراتی شعبے سے وابستہ افراد خصوصاً مزدور طبقہ حالیہ مہنگائی کے سبب شدید مشکلات کا شکار ہو گیا، مسلسل بڑھتی ہوئی قیمتوں  نے نہ صرف یومیہ اجرت پر کام کرنے والوں کی زندگی اجیرن کر دی ہے بلکہ کاروباری افراد بھی اس بحران سے محفوظ نہیں رہے۔ مہنگائی کے باعث کئی تعمیراتی منصوبے التوا کا شکار ہو چکے ہیں، جس کے نتیجے میں دیہاڑی دار مزدوروں کیلئے روزگار کے مواقع محدود ہوتے جا رہے ہیں، کئی مزدور ایسے ہیں جو کرایہ، بچوں کی تعلیم اور بجلی کے بل تک ادا کرنے کی استطاعت نہیں رکھتے۔ گزشتہ پانچ برسوں میں سیمنٹ کی قیمت میں تین گنا اضافہ دیکھا گیا ہے، جو اب 1300 روپے فی بوری سے تجاوز کر چکی ہے، اسی طرح سریا کی قیمت بھی غیرمعمولی طور پر بڑھ کر 70 ہزار روپے فی ٹن سے 2 لاکھ 25 ہزار روپے فی ٹن سے زیادہ ہو چکی ہے۔ شہریوں کا کہنا ہے کہ حکومت کو فوری طور پر اس شعبے پر توجہ دینی چاہئے اور قیمتوں میں استحکام لانے کے لئے ریلیف پیکیج متعارف کرانا چاہئے تاکہ مزدوروں کے گھروں کے چولہے دوبارہ جل سکیں اور معیشت کی یہ اہم صنعت دوبارہ بحال ہو سکے۔