پاکستان کا ایشیا کپ کے بعد جونیئر ہاکی ٹیم کو ورلڈکپ کیلئے بھارت نہ بھیجنے کا فیصلہ

07-14-2025

(ویب ڈیسک)پاکستان کی جانب سے ایشیا کپ کے بعد جونیئر ہاکی ٹیم کوورلڈ کپ کیلئے بھارت نہ بھیجنے کا فیصلہ کرلیا گیا۔

ذرائع کے مطابق پاکستان جونیئر ہاکی ٹیم کو بھی بھارت جانے کی اجازت نہیں دی جائے گی، جونیئر ہاکی ورلڈ کپ نومبر دسمبر میں بھارت میں شیڈول ہے۔ذرائع کا کہنا ہے کہ ایشیا کپ کے لیے اجازت نہ ملنے سے متعلق پی ایچ ایف کو آگاہ کیا جا چکا ہے، پی ایچ ایف کو جونیئر ہاکی ورلڈ کپ کے حوالے سے بھی آگاہ کر دیا گیا ہے۔ ذرائع کے مطابق پاکستان ہاکی فیڈریشن اب اس متعلق باضابطہ اعلان کرے گی، پی ایچ ایف کو بتا دیا گیا ہے کہ رواں برس کوئی ٹیم بھارت نہیں جائے گی۔   یاد رہے کہ ایف آئی ایچ جونیئر ہاکی ورلڈ کپ کے شیڈول کا اعلان کر چکی ہے، جونیئر ہاکی ورلڈ کپ 28 نومبر سے 10 دسمبر تک کھیلا جانا ہے، پاکستان اور بھارت کی جونیئر ہاکی ٹیمیں گروپ بی میں شامل ہیں۔