اے این ایف کی 9 کارروائیاں، 65 کلو منشیات برآمد، 9 ملزمان گرفتار

07-14-2025

(لاہور نیوز) اے این ایف نے مختلف شہروں میں بالخصوص تعلیمی اداروں کے اطراف منشیات سمگلنگ و منشیات فروشی کے خلاف کریک ڈاؤن کرتے ہوئے 3 خواتین سمیت 9 ملزمان کو گرفتار کر لیا۔

اینٹی نارکوٹکس فورس کے ترجمان  نے بتایا کہ ملک بھر میں 9 کارروائیوں میں 98 لاکھ 29 ہزار روپے سے زائد مالیت کی 65.278 کلو گرام منشیات برآمد کی گئی۔ لاہور میں شالیمار باغ کے قریب موٹرسائیکل سوار ملزم کے قبضے سے 13.20 کلو چرس اور 6 کلو افیون برآمد، کراچی کی ہجرت کالونی کے قریب موٹر سائیکل سوار ملزم کے قبضے سے 12 کلو چرس برآمد کی گئی۔ اسلام آباد موٹروے ٹول پلازہ پر مسافر بس میں سوار ملزم کے قبضے سے 2.4 کلو چرس ضبط کی گئی، گرفتار افراد کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا۔ پشاور میں یونیورسٹی روڈ پر کالج کےقریب گاڑی سے 3 کلو ہیروئن ضبط کر کے ملزم گرفتار کیا گیا، پشاور میں ہی یونیورسٹی کے قریب ملزم کے قبضے سے 1.5 کلو چرس پکڑی گئی، گرفتار ملزمان  نے تعلیمی اداروں کے طلبہ کو منشیات فروخت کرنے کا اعتراف کیا۔ فیصل آباد ایئرپورٹ پر قطر جانے والے مسافر کے سامان سے 1.378 کلو آئس برآمد کرکے ملزم گرفتار کیا گیا، وارسک روڈ پشاور میں کوریئر آفس سے گجرات اور کراچی بھیجے جانے والے پارسلز سے 1.8 کلو چرس ضبط کی گئی۔ کراچی میں سہراب گوٹھ بس سٹینڈ کے قریب 2 خواتین کے قبضے سے 12کلو چرس اور جامشورو ٹول پلازہ کےقریب مسافر بس میں سوار خاتون کے قبضے سے 12 کلو چرس برآمد کرکے ملزم خاتون کو گرفتار کیا گیا۔