تحریک انصاف کے 5 منحرف اراکین قومی اسمبلی پارٹی سے فارغ

07-13-2025

(لاہور نیوز) پاکستان تحریک انصاف نے 5 منحرف اراکین قومی اسمبلی کو پارٹی سے نکال دیا، اس ضمن میں باقاعدہ نوٹیفکیشن بھی جاری کر دیا گیا ہے۔

چئیرمین پی ٹی آئی بیرسٹر گوہر  نے منحرف اراکین اسمبلی کو پارٹی سے نکالنے کا نوٹیفکیشن جاری کر دیا جس کے مطابق رکن قومی اسمبلی اورنگزیب خان کھچی، ظہور قریشی، عثمان علی، مبارک زیب اور الیاس چودھری کو پی ٹی آئی سے نکال دیا گیا ہے۔ اراکین قومی اسمبلی کو پارٹی سے نکالنے کے حوالے سے کہا گیا ہے کہ مذکورہ اراکین  نے 26ویں آئینی ترمیم کی حمایت کیلئے پارٹی ہدایات کی خلاف ورزی کی جبکہ پارٹی اجلاس میں ترمیم کی مخالفت کا متفقہ فیصلہ کیا گیا تھا۔ نوٹیفکیشن میں کہا گیا ہے کہ منحرف اراکین نے 21 اکتوبر 2024 کو ترمیم کے حق میں ووٹ دیا، پارٹی وفاداری اور حلف کی سنگین خلاف ورزی کی گئی ہے، پارٹی ہدایت پر عمل نہ کرنے پر شوکاز نوٹس جاری کیا گیا تھا اور شوکاز نوٹس پر جواب نہ دینے پر پارٹی نے کارروائی کی۔ نوٹیفکیشن میں ان اراکین کو دوسری جماعت میں شمولیت پر نااہلی کا بھی مستحق قرار دیا گیا ہے، یہ بھی مطالبہ کیا گیا ہے کہ ان اراکین قومی اسمبلی کو عہدے سے بھی نااہل قرار دیا جائے۔