ایف آئی اے کے منی لانڈرنگ کی تحقیقات کیلئے اہم ایس او پیز جاری

07-12-2025

(ویب ڈیسک) ڈی جی ایف آئی اے نے منی لانڈرنگ کی تحقیقات کے حوالے سے تاریخی اقدام کرتے ہوئے کارروائیوں کو مزید مؤثر اور شفاف بنانے کیلئے اہم ایس او پیز جاری کر دئیے۔

ترجمان ایف آئی اے کی جانب سے جاری بیان کے مطابق ایس او پیز کا مقصد اختیارات کے ناجائز استعمال کا خاتمہ، شفافیت کا فروغ اور احتساب کے عمل کو یقینی بنانا ہے، ایف آئی آر کے اندراج کو بہتر، ضابطے کے تابع اور قابل نگرانی بنایا گیا ہے۔ ترجمان ایف آئی اے کے مطابق ایس او پیز میں اس  امر کو لازمی قرار دیا گیا ہے کہ ایف آئی آر درج کرنے سے قبل بنیادی جرم کا حوالہ دینا ضروری ہو گا، اگر کوئی مقدمہ بنیادی جرم کے بغیر ہے تو اس پر منی لانڈرنگ کے تحت کارروائی نہیں کی جا سکے گی۔ بیان میں کہا گیا کہ نئے ایس او پیز میں تحقیقاتی عمل کے لئے واضح ٹائم لائن مقرر کر دی گئی ہے، جس پر عملدرآمد تمام تفتیشی افسران کے لئے لازم ہو گا، تفتیش میں تاخیر کی صورت میں متعلقہ افسر کے خلاف محکمانہ کارروائی عمل میں لائی جائے گی۔ ایف آئی آر درج کرنے کے اختیارات کو  اعلیٰ سطح کی منظوری سے مشروط کر دیا گیا ہے، تمام کیسز اور انکوائریز کی 24 گھنٹے مانیٹرنگ ایف آئی اے ہیڈکوارٹرز سے کی جائے گی۔