جعلی سرکاری افسر پکڑا گیا، آئس سمگلنگ میں بھی ملوث نکلا

07-12-2025

(لاہور نیوز) سول لائن پولیس نے کارروائی کرتے ہوئے خود کو جعلی سرکاری افسر ظاہر کرنے والے ایک شخص کو گرفتار کر لیا، جو آئس جیسے مہلک نشے کی سمگلنگ میں بھی ملوث پایا گیا۔

ایس پی سول لائنز کے مطابق پولیس  نے دورانِ سنیپ چیکنگ ایک مشکوک گاڑی کو روکا جس پر نیلی بتی اور جعلی سبز نمبر پلیٹ نصب تھی، گاڑی کی تلاشی کے دوران سیٹ کے نیچے سے 100 گرام آئس برآمد ہوئی، جس پر گاڑی میں موجود شخص کو موقع پر گرفتار کر لیا گیا۔ گرفتار ملزم کی شناخت عمران کے نام سے ہوئی جو خود کو سرکاری افسر ظاہر کر کے آزادانہ گھوم رہا تھا۔ ابتدائی تفتیش میں عمران  نے اعتراف کیا کہ وہ جعلی افسر بن کر منشیات کی ترسیل کرتا تھا تاکہ قانون نافذ کرنے والے اداروں کی چیکنگ سے بچ سکے، اس مقصد کیلئے اس نے اپنی ذاتی گاڑی پر نیلی بتی اور جعلی سرکاری نمبر پلیٹ لگا رکھی تھی۔ تفتیش میں انکشاف ہوا کہ عمران ضلع وہاڑی کا رہائشی ہے اور وہاڑی پولیس کو چوری اور دھوکہ دہی کے متعدد مقدمات میں مطلوب بھی ہے۔ پولیس نے ملزم کے خلاف مقدمہ درج کر کے اسے مزید تحقیقات کیلئے انویسٹی گیشن ونگ کے حوالے کر دیا۔