5 کروڑ 10لاکھ درخت لگانے کے گرین پنجاب مشن کا آغاز

07-11-2025

(لاہور نیوز) وزیراعلیٰ پنجاب مریم نواز کے گرین پنجاب مشن کے تحت سموگ اورکلائمیٹ چینج کے اثرات کے خاتمے کیلئے ریکارڈ شجرکاری مہم کا آغاز کر دیا گیا۔

وزیراعلیٰ پنجاب مریم نواز کے گرین پنجاب مشن کے تحت سموگ کے خاتمے کیلئے گزشتہ ایک سال میں ایک کروڑ 30 لاکھ سے زائد درخت لگائے گئے۔ سینئرصوبائی وزیرمریم اورنگزیب نے کہا ہے کہ سموگ کے خلاف ہماری جنگ صرف موسمی نہیں، یہ سسٹم بیسڈ اصلاحات اور ماحولیاتی ایمرجنسی کے تحت مستقل بنیادوں پر جاری ہے، رواں مالی سال 2025-26 میں ملکی تاریخ کی سب سے بڑی فارسٹ کوریج،مجموعی طورپر 5 کروڑ 10لاکھ درخت لگانے کے مقررہ ہدف کے حصول پر کام کا آغاز ہو گیا ہے۔ انہوں نے بتایا کہ "پلانٹ فار پاکستان" انیشی ایٹو کے تحت 3 کروڑ 42 لاکھ درخت لگانے کا ہدف مقرر کیا گیا ہے، 41 ہزار 345 ایکڑ رقبے پر شجرکاری سے"گرین پاکستان پروگرام" کے دائرہ کار میں وسعت لائی جائے گی، ،18 ہزار 385 ایکڑ پر 1.5 کروڑ سے زائد درخت لگانےپر کام شروع ہو چکا ہے۔ سینئر صوبائی وزیر کا کہنا ہے کہ نہروں اور سڑکوں کے کنارے 3000 کلومیٹر پر 18 لاکھ پودے لگانے کا کام شروع ہے، اس طرح اس مالی سال میں ٹوٹل تقریبا 5 کروڑ 10 لاکھ پودہ جات لگائے جائیں گے۔  مریم اورنگزیب نے بتایا کہ سموگ اور جنگلاتی آگ سے نمٹنے کیلئے مری اور کہوٹہ میں شیلڈنگ سمٹس پروگرام شروع کیا گیا ہے، جس کے تحت 600 فائر واچرز کی بھرتی، واچ ٹاورز اور فائر وہیکلز فراہم کی جائیں گی، جدید ٹیکنالوجی پر مبنی جی آئی ایس، ڈرون اور سیٹلائٹ نگرانی کا نظام فعال ہونے سے تجاوزات اور آتشزدگی کی فوری نشاندہی ممکن ہوگی۔ انہوں نے کہا کہ صوبے بھر میں 104 فارسٹ کمانڈ اینڈ کنٹرول سنٹرز کا قیام، جنگلات کی 24 گھنٹے مانیٹرنگ یقینی بنائی جا رہی ہے، ماحولیاتی سیاحت کے فروغ کیلئے لال سوہانرا نیشنل پارک اور سالٹ رینج میں بین الاقوامی معیار کی سہولیات کی فراہمی جاری ہے۔ ان کا کہنا تھا کہ محفوظ قدرتی علاقوں کے قیام کیلئے ماحول دوست لیڈ سرٹیفائیڈ عمارتوں کی تعمیر ماحولیاتی توازن کی بحالی میں اہم سنگ میل ثابت ہوگی، درختوں کی قطاروں کی ڈیجیٹل نمبر شماری اور جی آئی ایس پر مبنی فہرست سازی کا عمل جاری ہے، شفافیت اور مؤثر منصوبہ بندی یقینی بنائی جائے گی۔ وزیراعلیٰ مریم نواز کے وژن کے تحت اپنی نسلوں کے لیے ایسا ماحول چھوڑنا ہے جو سانس لینے کے قابل ہو، درختوں کی حفاظت صرف ماحول نہیں، زندگی کی حفاظت ہے۔" "پلانٹ فار پاکستان ہو یا گرین پنجاب پروگرام، یہ صرف شجرکاری نہیں بلکہ مستقبل محفوظ بنانے کی تحریک ہے۔"