ملازمت کیلئے شہریوں کو سعودی عرب بھجوانے کا جھانسہ دینے والا انسانی سمگلر گرفتار

07-03-2025

(ویب ڈیسک) شہریوں کو ملازمت کے لیے سعودی عرب ورک ویزا پر بھجوانے کا جھانسہ دینے والا انسانی سمگلر گرفتار کرلیا گیا۔

ترجمان  کے مطابق ایف آئی اے لاہور زون  کا انسانی سمگلنگ اور ویزا فراڈ میں ملوث عناصر کے خلاف کریک ڈاؤن جاری ہے اور اس دوران ایک ملزم کو گرفتار کیا گیا ہے، جس کی شناخت عاصم طاہر کے نام سے ہوئی۔ ملزم کو چھاپہ مار کارروائی میں لاہور سے گرفتار کیا گیا، جو شہریوں کو بیرون ملک ملازمت کا جھانسا دے کر لاکھوں روپے بٹورنے میں ملوث پایا گیا۔ ملزم  نے شہریوں کو سعودی عرب ورک ویزا پر بھجوانے کا جھانسا دے کر 16لاکھ 65 ہزار روپے ہتھیائے  ۔ ملزم عاصم طاہر شہریوں کو بیرون ملک بھجوانے میں ناکام رہا اور روپوش ہوگیا تھا، جسے گرفتار کرکے تفتیش کا آغاز کر دیا گیا ہے۔ ڈائریکٹر لاہورایف آئی اے سرفراز خان ورک نے اس حوالے سے کہا کہ روزگار کے جھوٹے خواب دکھا کر انسانوں کی تجارت ناقابلِ برداشت ہے، انسانی سمگلرز کے خلاف کارروائیاں مزید تیز کی جا رہی ہیں، انسانی اسمگلنگ میں ملوث عناصر کو قانون کے مطابق سخت سزائیں دلوائی جائیں گی۔