حکومت کا 5 لاکھ ٹن چینی امپورٹ کرنے کا فیصلہ

07-02-2025

(لاہور نیوز) حکومت نے 5 لاکھ ٹن چینی امپورٹ کرنے کا فیصلہ کر لیا۔

ذرائع کے مطابق حکومت نے ملک میں چینی کی ممکنہ قلت اور قیمتوں میں اضافہ روکنے کیلئے 5 لاکھ ٹن چینی امپورٹ کرنے کا فیصلہ کیا ہے، یہ درآمد حکومتی سطح پر کی جائے گی تاکہ عوام کو ریلیف فراہم کیا جا سکے۔ اعلیٰ سرکاری ذرائع کا کہنا ہے کہ حکومت نے واضح طور پر فیصلہ کیا ہے کہ چینی کی قیمتوں میں کسی صورت اضافہ نہیں ہونے دیا جائے گا۔ اس حوالے سے وزارتِ صنعت و پیداوار اور متعلقہ اداروں کو ہدایات جاری کر دی گئی ہیں کہ مارکیٹ میں مصنوعی قلت یا قیمتوں میں غیر ضروری اضافے کی روک تھام کیلئے اقدامات کئے جائیں۔ ذرائع کا مزید کہنا ہے کہ چینی کو مہنگے داموں فروخت کرنے یا ذخیرہ اندوزی کرنے والوں کے خلاف کریک ڈاؤن شروع کیا جائے گا اور اس حوالے سے ایف بی آر، ضلعی انتظامیہ اور پرائس کنٹرول کمیٹیوں کو متحرک کر دیا گیا ہے۔