گورنر پنجاب سے عمانی بائیکرز کے وفد کی ملاقات، سیاحتی، ثقافتی امور پر بات چیت

07-02-2025

(لاہور نیوز) گورنر پنجاب سردار سلیم حیدر خان سے عمان سے تعلق رکھنے والے بائیکرز کے وفد نے ملاقات کی۔

سردار سلیم حیدر خان نے بائیکرز سے بات چیت کرتے ہوئے کہا کہ عمانی بائیکرز کے دورہ سے دونوں ممالک کے درمیان عوامی، ثقافتی و سیاحتی تعلقات کو فروغ ملے گا، امید ہے کہ عمانی بائیکرز واپس جا کر دنیا میں پاکستان کے مثبت امیج کواجاگر کریں گے۔ گورنر پنجاب نے کہا کہ پاکستان اِسلام کا قلعہ اور ایک پر امن ایٹمی قوت ہے، پاکستان نے ہمیشہ عالمی سطح پر اسلامی ممالک کی خودمختاری اور جغرافیائی سالمیت کے لیے عالمی فورمز پر آواز اٹھائی، پاکستان اسلامی دنیا کی واحد ایٹمی طاقت ہے، دشمن ہماری طرف میلی آنکھ سے دیکھنے کی جرات نہیں کر سکتا، انڈیا کی طرف سے جنگ مسلط کی گئی تو ہم نے اپنے سے پانچ گناہ بڑے دشمن کو شکست دی اورنئی جنگی تاریخ رقم کی۔ انہوں نے کہا کہ دونوں ممالک کے درمیان کھیلوں سمیت تمام شعبوں میں باہمی تعاون کے وسیع مواقع موجود ہیں،عمانی بائیکرز کا دورہ پاکستان اور عمان کے درمیان سیاحتی اور ثقافتی تعلقات کے فروغ میں اہم قدم ہے، پاکستان سیاحتی اعتبار سے ایک پر امن اور خوبصورت ملک ہے ، پاکستانی مہمان نواز اور محبت کرنے والی قوم ہیں ۔ رکن عمانی بوشر بائیکرز کلب محمد النبھانی نے گفتگو کرتے ہوئے کہا کہ یہاں آکر بہت خوشی ہوئی، پاکستانیوں کی طرف سے ملنے والی اس محبت کو کبھی نہیں بھلا پائیں گے۔ عمانی وفد کا کہنا تھا کہ  دورے کا مقصد اتحاد، دوستی اور علاقائی تعاون کے پیغام کو تقویت دینا ہے۔ اس موقع پر پاکستان پیپلز پارٹی گلف کے صدر میاں منیر ہنس،نائب صدر کاشف ،عاطف ،بوشر بائیکرز کلب کے ممبران عیسیٰ الحسنی، محمد النبھانی، کامل اے آئی وہبی، ماجد الرواحی، محمد منینی، ماجد الوہابی اور محمد الرواحی سمیت دیگر موجود تھے۔