مہنگائی مافیا کا راج برقرار، شہری سستی اشیائے خورونوش کو ترس گئے

06-28-2025

(لاہور نیوز) ملک میں مہنگائی نے عوام کی کمر توڑ دی ہے، اشیائے خورونوش کی قیمتیں آسمان کو چھونے لگی ہیں۔

حکومتی دعوے دھرے کے دھرے رہ گئے، جبکہ مہنگائی مافیا بے لگام ہو چکا ہے، شہری روزمرہ ضروریات کی اشیا خریدنے سے بھی قاصر نظر آتے ہیں۔ برائلر گوشت کی قیمت ایک بار پھر عدم استحکام کا شکار ہے، اور مارکیٹ میں فی کلو گوشت 14 روپے مہنگا ہو کر 417 روپے فی کلو تک پہنچ گیا ہے، جبکہ فارمی انڈوں کی فی درجن قیمت بدستور 244 روپے پر برقرار ہے، ہول سیل مارکیٹ میں انڈوں کی پیٹی 7 ہزار 200 روپے میں فروخت کی جا رہی ہے۔ سبزیوں اور پھلوں کی قیمتوں میں بھی شدید اضافہ دیکھنے میں آیا ہے، مارکیٹ میں میتھی 160 روپے، کریلے 120 روپے، آلو 110 روپے، اور بینگن 100 روپے فی کلو میں فروخت ہو رہے ہیں۔ پھلوں کی قیمتوں  نے بھی عوام کو شدید پریشانی میں مبتلا کر دیا ہے، سیب 600، پپیتا 550، فالسہ 350، اور سندھڑی آم 270 روپے فی کلو میں دستیاب ہیں۔ شہریوں کا کہنا ہے کہ حکومت کی جانب سے قیمتوں کو کنٹرول کرنے کے دعوے صرف بیانات کی حد تک محدود ہیں، مہنگائی کا طوفان تھمنے کا نام نہیں لے رہا، اور غریب آدمی کیلئے دو وقت کی روٹی کا حصول بھی مشکل تر ہوتا جا رہا ہے۔