پنجاب کے تعلیمی بورڈز میں میٹرک اور انٹر کے پریکٹیکل امتحان ختم کرنے پر غور

06-27-2025

(لاہور نیوز) پنجاب بھر کے تعلیمی بورڈز میں میٹرک اور انٹرمیڈیٹ کے پریکٹیکل امتحانات کے نظام میں اصلاحات پر غور شروع کر دیا گیا۔

ذرائع کے مطابق نویں اور دسویں جماعت کے پریکٹیکل ختم کر کے ان کی جگہ دس، دس نمبروں کے متبادل تحریری امتحانات لینے کی تجویز زیر غور ہے۔ پنجاب بورڈز کمیٹی آف چیئرمینز نے اس سلسلے میں چیئرمین ساہیوال بورڈ کی سربراہی میں ایک خصوصی کمیٹی تشکیل دی ہے جو پریکٹیکل امتحانات کے نئے طریقہ کار پر پالیسی مرتب کرے گی۔ کمیٹی کے ارکان فیڈرل بورڈ میں پہلے سے رائج اے ٹی پی نظام کا تفصیلی جائزہ لیں گے، جہاں یہ نظام پہلے ہی متعارف کرایا جا چکا ہے۔ ذرائع کا کہنا ہے کہ اگر تجویز منظور ہو گئی تو یہ نیا طریقہ کار سال 2027 سے صوبے بھر کے تمام تعلیمی بورڈز میں نافذ العمل ہو گا، انٹرمیڈیٹ سطح پر بھی گیارہویں اور بارہویں جماعت کے طلبہ کیلئے بیس، بیس نمبروں پر مشتمل متبادل تحریری پریکٹیکل متعارف کرایا جائے گا۔ بورڈ حکام کے مطابق اساتذہ اور طلبہ کی جانب سے موجودہ پریکٹیکل نظام پر اعتراضات اور تشویش کے بعد نظام متعارف کرانے کا فیصلہ کیا گیا ہے تاکہ امتحانات کو زیادہ شفاف، معیاری اور قابلِ عمل بنایا جا سکے۔