نیپرا نے بجلی کے بنیادی ٹیرف میں کمی کی منظوری دے دی

06-25-2025

(ویب ڈیسک) نیشنل الیکٹرک پاور ریگولیٹری اتھارٹی (نیپرا ) نے آئندہ مالی سال 2025-26 کیلئے بجلی کے بنیادی ٹیرف میں اوسطاً 1 روپے 50 پیسے فی یونٹ کمی کی منظوری دے دی۔

ذرائع کے مطابق نیپرا  نے آئندہ مالی سال کیلئے بجلی کا اوسط بنیادی ٹیرف 34 روپے فی یونٹ مقرر کیا ہے جس کا حتمی فیصلہ وفاقی کابینہ کرے گی، کابینہ کی منظوری کے بعد یہ نیا ٹیرف پورے ملک میں یکساں لاگو کیا جائے گا۔ نیپرا  نے گزشتہ روز ہی پاور پرچیز پرائس (پی پی پی) کا بھی اعلان کیا جس کے مطابق نیشنل اوسط پی پی پی میں ایک روپے دو پیسے فی یونٹ کی کمی کی گئی ہے، نئے مالی سال کیلئے نیشنل اوسط پی پی پی 25 روپے 98 پیسے فی یونٹ مقرر کی گئی ہے جبکہ رواں مالی سال کیلئے یہ قیمت 27 روپے 35 پیسے فی یونٹ تھی۔ دوسری جانب سی پی پی اے  نے مئی کی ماہانہ ایڈجسٹمنٹ کے تحت بجلی کی قیمت میں 10 پیسے فی یونٹ اضافے کی درخواست نیپرا میں دائر کر دی ہے، اس درخواست پر سماعت 30 جون کو متوقع ہے۔