قومی سلامتی کمیٹی کا اجلاس آج، علاقائی صورتحال پر مشاورت ہو گی

06-23-2025

(لاہور نیوز) وزیراعظم نے آج قومی سلامتی کمیٹی کا اہم ترین اجلاس طلب کر لیا ہے، اجلاس میں عسکری اور سول قیادت شرکت کرے گی۔

ذرائع کے مطابق اجلاس میں ایران، اسرائیل اور امریکہ کے درمیان جاری تنازعے پر تفصیلی مشاورت کی جائے گی اور ایران کی حمایت سمیت دیگر اہم امور پر بڑے فیصلے کئے جانے کا امکان ہے۔ اجلاس میں فیلڈ مارشل سید عاصم منیر اپنے حالیہ دورہ امریکہ پر شرکا کو اعتماد میں لیں گے، قومی سلامتی کمیٹی کے اجلاس میں ملکی داخلی اور سرحدی سکیورٹی کی صورتحال کا بھی جائزہ لیا جائے گا۔ اجلاس آج دوپہر 12 بجے وزیراعظم ہاؤس میں ہو گا، وزیر دفاع خواجہ آصف، وزیر داخلہ محسن نقوی، نائب وزیراعظم اسحاق ڈار اور وزیر خزانہ محمد اورنگزیب سمیت دیگر شریک ہوں گے۔ واضح رہے کہ امریکہ  نے اتوار کی صبح ایران میں تین نیوکلیئر تنصیبات پر براہ راست فضائی حملے کر دیئے، واشنگٹن پہلی بار براہ راست اسرائیل کی جاری جنگ میں شامل ہو گیا۔