مون سون سے قبل جاری منصوبے جلد مکمل ، نئی کھدائی نہ کرنے کا حکم

06-22-2025

(ویب ڈیسک) مون سون سے قبل لاہور میں نئی کھدائی نہیں ہوگی،جاری منصوبوں کے کھدائی والے حصے مون سون سے قبل مکمل جبکہ قیمتی بارشی پانی کو سٹور کرنے کیلئےانڈرگراؤنڈ واٹر ٹینک بھی جلد فعال ہوں گے۔

وزیراعلیٰ پنجاب کی ہدایات پرمون سون کی تیاریاں مزید تیز کر دی گئی ہیں۔ اس حوالے سے سیکرٹری ہاؤسنگ نورالامین مینگل نے شہر کے مختلف علاقوں کا دورہ کیا اور سگیاں پرلاہور ڈویلپمنٹ پروگرام کے جاری ترقیاتی کاموں کا جائزہ لیا۔ نورالامین مینگل  نےشاہدرہ ٹیوٹا کالج کے نزدیک گلیوں اور پنجاب اسمبلی میں زیر تعمیر واٹر ٹینک کا بھی دورہ کیا۔اس موقع پر ڈی جی واسا پنجاب طیب فرید، ڈی جی ایل ڈی اے، ڈی سی اور ایم ڈی واسا نے بریفنگ دی۔ سیکرٹری ہاؤسنگ نے تعمیراتی سائٹس پر آگاہی بورڈز اور حفاظتی اقدامات نہ ہونے پر اظہار برہمی کرتے ہوئے تعمیراتی سائٹس پر آگاہی بورڈ، حفاظتی اقدامات اور وارننگ سائن نمایاں آویزاں کرنے کا حکم دیا۔ نورالامین مینگل  نے ہدایت کی کہ ترقیاتی کاموں کے ساتھ انسانی جانوں کی حفاظت اولین ترجیح ہونی چاہیے،مون سون سے قبل نئی کھدائی ہرگز نہ کی جائے، پہلے سے جاری منصوبوں کے کھدائی والے حصے جلد مکمل کیے جائیں۔ ان کا کہنا تھا کہ انڈر گراؤنڈ واٹر ٹینک مکمل ہونے سے قیمتی بارشی پانی کا بہترین استعمال ممکن ہو گا۔